Goa magkakaiguang higanteng stadium

Ni Sonny Malate

Goa, Camarines Sur--- Maogmang pig-anuncio ni Alkalde Alfredo P. Gonzaga III na magkakaigua na nin dakulaon na stadium an saiyang banwaan. An estructura iguang 7,000 na capacidad asin iyo an pinakadakulang arog kaining edificio sa mga banwaan sa Camarines Sur.

An stadium na padagos an pagconstruir ngonian namumugtak harani sa PAGCOR Evacuation and Recreation Center, barangay Tagongtong digdi. Segun sa alkalde, an stadium iguang kawatan nin basketball asin ibang sports event. Siring man, ini may mahiwas na  espacio para sa darakulang pagtiripon arog kan concert, rally asin iba pa.

Initialmente, ini para sa mga taga Goa sana alagad sa maabot na mga bulan ini  bubukasan para sa ibang localidad mantang target kaining maserbihan bako sanang mga taga digdi. Ginikanan kan fundo kan proyecto iyo an Ako Bicol Partylist sa halagang P300 million.

An stadium magigin burabod man nin dagdg na ingreso financial kan gobyerno local oras na magpasar nin ordinansa an Sangguniang Bayan digdi na matasar nin bayad sa mga magamit kaini orug na an mga taga luwas kan Goa o privadong sector.

Apwera kaini, an gobyerno local  padagos man kan pagpacompleto kan consruction kan Goa Municipal Infirmary na ibinalyo hale sa kataid  kan Goa Municipal Police Station pasiring sa may campus kan  Philippine Science High School.

Manonotaran man na sa presente padagos an pagconstruir kan bagong  edificio kan Goa Community College sa kaparehong lugar. Fundo kan proyecto  sa paagi kan oficina ni Cong. Arnie B. Fuenteballa.

An serbisyong pangsalud kan infirmary significante mantang an district hospital katungod kan Goa Integrated Central Terminal dae pa napapakinabangan kan publico hasta sa ngonian. 

Ini pig-initiar kan gobyerno probinsyal pirang taon na an nakaagi alagad dae pa nagagamit huli sa isyu dapit sa zoning na posibleng magdara nin peligro sa buhay, danyos sa estructura asin  mga equipaje. An hospital nasa bangbangan mismo kan Culasi River na parating minalangkaw an tubig kun may bagyo.

Sa masunod na semana an infirmary maggigin recipiente nin donasyon na mga medical equipment hale sa pamilya Regalado-Lee. Sa mga maabot na bulan ini ipapaaccredit sa PhilHealth tanganing orug na mapahiwas an serbisyo medical sa mga namamanwaan.

Mientrastanto, orgulyong pigbuyagyag kan alkalde na magkakaigua na  nin sarong super health center sa barangay Balaynan digdi. Fundo kan proyekto gikan sa oficina ni Sen. Bong Go. Mayormenteng makikinabang kan serbisyo kaini iyo an mga barangay sa irayang parte kan Goa.

Si Gonzaga, katabang an Sangguniang Bayan sa pangengenot ni Bise Alkalde Antollin P. Respall an padagos sa pagconsiger nin fundo para sa mga proyectos  arog kan pagpatapos kan Sangguniang Bayan legislative building. Sunod man na tututokan iyo an fundo para sa bagong mercado publico. 

Dinagdag pa kan alkalde na nacunsiger niya an fundo ki Mayor Abby Binay para sa rehabilitasyon kan tulay sa Inansagan River sa barangay Napawon.

Sa orug na madaling panahon mapoon na man an pagconstruir kan primerong condo unit sa 15 condo building kan Isarog Midland Homes, sa barangay Matacla,  sarong proyecto sa irarom kan Pambansang Pabahay para sa Pilipino Program ni Pres. Ferdinand R. Marcos, Jr. 

Si Alkalde Gonzaga anom pa sanang bulan sa puwestong nabayaan ni  defuntong Alkalde Marcel S. Pan. Ngonian siya nagmamawot na magpadagos sa puwesto tanganing masusteniran an estado kan Goa bilang centro kan progreso sa Partido Area.

Stadium sa banwaan nin Goa padagos na pigcoconstruir. (Photo - LGU Goa)