Ground zero sa paggadan orig ibinaba sa 500 metros

Makakatabang sa mga paraoma an desisyon kan Department of Agriculture (DA) Secretary William Dar na ibaba sa 500 metros an ground zero hale sa dating 1,000 metros kan lugar na may nagpositivo sa African Swine Fever (ASF) na dapat i-depopulate an ataman na orig na apektado kan virus sa hayop nganing dai na mag-ulakit.

Dakul na hog raisers sa Bicol orog na an mga paraoma sa barangay nanghinayang kan paggaradan kan saindang ataman na mga orig dawa na ngani binabayadan kan DA nin cinco mil pesos cada payo.

Kinumfirmar ni Emily Bordado, regional information officer kan DA Bicol na igwa nang direktiva sa sainda an opisina central kan saindang ahencia asin sa National Meat Inspector Service (NMIS) maging sa mga lokal na gobierno na dapat ipasunod an bagong direktiva na 500 metros na sana an ground zero sa pag-implementar kan depopulation sa hayop.

Alagad magdedefende man giraray sa lugar kun mahiwas an ASF sa barangay pueding gibohon 1,000 metros, sabi pa kan DA.

An caso kan ASF saro sa causa kan pagkulang-kulang nin suplay kan pork product sa mga mercado sagcod na naglangkaw an presyo, alagad sinabi pa ni Bordado kabale sa pig-aatribuer na dahilan bako lang an virus sa hayop envez an coronavirus disease lockdown asin halangkaw na presyo kan pambahog o feeds.

An anom na provincia sa Kabikolan apektado na kan ASF alagad an Camarines Sur iyo an mas may mahiwas na lugar na tinamaan mantang apektado an 17 mga banwaan asin ciudades na nagresulta sa pag-depopulate nin maabot sa 12,153 swine na apektado digdi an 2,214 hog raisers.

Pigkakarkulo na labi na sa P600 milyon an nagastos kan ahencia bilang indemnification assistance sa mga hog raisers.

Nagpupoon na an DA sa pagtao nin mga piglets sa mga paraoma sa lugar na zero sa caso sa virus nganing makatabang sa pagpatalubo kan suplay sa mercado. (dpa)