Groundbreaking kan primerong Condo project sa Partido ginibo

Ni Sonny Malate

Goa, Camarines Sur --- Ginibo kan Abril 3, 2025 an groundbreaking kan primerong condominium project sa Partido Area. An condominium mamumugtak sa barangay Matacla, mga 400 metros an distancia hale sa centro kan banwaan.

An condominium project sarong joint partnership kan gobyerno asin privadong sector tanganing masimbagan an kakulangan sa housing na pigkakarkulong nasa 6.5 million.

May pangaran na Isarog Midland Homes, ini sarong socialized condo housing community sa irarom kan Pambansang Pabahay para sa Pilipino Program o 4PH, sarong priority program ni Pres. Ferdinand R. Marcos, Jr. Ini may objetong magkaigua nin zero informal settlers sa taon 2028.

Project developer iyo an Consnet Builders, Inc. ni Ar. Bibiano Alindogan Luzande, Jr. Si Luzande sarong propiong taga Goa, may mahiwas na track record sa structural design/construction asin urban planning.

Presente sa actividad sinda Alkalde Alfredo P. Gonzaga III, Bise Alkalde Antolin P. Respall asin pag-iriba sa Sangguniang Bayan, Ar. Bibiano A. Luzande asin Technical Team, Bgy. Captain Amy de Vera kan Matacla asin mga bisita.

Nagpahayag nin kaogmahan asin bilog na suporta sa proyecto an alkalde mantang dakol an  mabebenipisyohan sa banwaan niya. Pigmawot niya man na lugod dagosdagos an proyecto mientras na dakol sa mga kahimanwa niya an mawot na magin beneficiaryo kan proyecto.

Si Ar. Luzande an nagpaabot man kan dakula niyang orgulyo na magkakaigua kan arog kaining proyecto sa mismong banwaan na namundagan niya. Segun sa saiya, sa ikatolong semana kan presenteng bulan mapoon na kan pagconstruir kan  primero sa kinseng condo building.

An condo project yaon sa 3,594 sq. m. na lote na binakal kan developer sa pamilya Perfecto-Estrella kan banwaan nin San Jose. An sarong condo unit may sukol na 27 sq. m. Kada sarong condo building na may limang eskalon iguang 120ng unit. Sa kagabsan makikinabang an nasa 1,800ng pamilya.

Calificadong aplicantes iyo an miembros kan Pag-IBIG na may minimun na 24ng bulan na premium payment. Tanganing makaaprobechar nin condo unit kaipohan may certificate of eligibility hale sa LGU kan Goa asin Department of Human Settlements (DHSUD). 

An condominium may mga amenities arog kan covered play court, multi-purpose social hall, commercial stalls asin swimming pool. ini harani sa simbahan, mga escuelahan asin commercial hub kan banwa.

Initialmente, an magigin beneficiaryo iyo an mga residentes kan Goa. Segun ki Luzande aadalan pa kan LGU Goa an posibilidad na makabale man sa beneficiaryo an mga nakaistar sa pagtaraid na localidad. An condo unit may bulanan na hulog na Tres Mil Kinyentos (P3,500.00) babayadan sa laog nin 30 años.

An manejamiento kan Isarog Midland Homes malatag nin Information Desk sa barangay hall kan Matacla asin sa Municipal Hall kan Goa tanganing masimbagan an kahapotan kan mga interesadong aplicante.

Groundbreaking kan enot na condo sa Partido. Si Mayor Alfredo P. Gonzaga III nasa ikaapat hale sa too.