Gulpi Sanang Auto sa Tinampo

An Naga daa garo naman America ta kadakul auto barago pati, magagayon, nagkikirintab may dagdag pang pahingurag na motorsiklo, e-trike, e-bike, e-padyak asin mga bisikleta kaya an mga tao bihira nang magralakaw apuera kan mga gurang asin may mga helang na gustong mag-exercise.

An Naga garo man daa Manila ta grabe na an trapik pero mayong disiplina an mga tsuper sa mga tinampo asin lalo na sa highway.

Alagad sa America dakul an garahe kaya dikit an mga auto na nakaparada sa gilid kan tinampo asin highway.

Sa Manila asin digdi sa provincia mayo nin mga paradahan an mga auto kaya ipigpapasiklab an mga sampulong auto sa luwas kan harong kaya nasasakitan mag-aragui an ibang auto asin lalong nakakahibog kan trapiko sa mga tinampo.

An pinaka-masaklap digdi sa provincia asin lalo na sa Naga asin Legazpi ta sa mga subdivision atang raraot an tinampo, baku-baku pa asin ralabot wala-too, mga limang kotse an nakaparada sa luwas kan harong de lalong nadidipisilan an mga motorista asin an mga namamanwaan.

Pigpahiwas man kuta na si mga highway pero nakatirindog pa sa tahaw kan kalye an mga poste kan kuryente kaya gulping aksidente an nagyayari.

An mga darakulaon na truck, haralabaon pa may magagabat na kargamento an nagbibiyahe aldaw-bangui kaya masakiton magbalyo sa tinampo asin kadakul pang naaksidente. An mga pulis pabaya man magdisiplina kan mga motorista.

Kaya sabi kan iba maggamit nin over pass tanganing maimbitaran an aksidente sa pagbabalyo sa highway. Pero sa Naga ngani na may saro-sarong overpass dae pa piggagamit, tindihan sana kan mga political adverstisements.

Igwa man sarong municipyo digdi sa CamSur ata nang hayapit na an highway pigbugtakan pa nin halabang island sa atubangan kan municipyo di kadakul an nagkaka-araksidente.

Magayon kuta na an kadakul auto ta kaskas an biyahe asin marikas an movemiento kan mga tao asin produkto pero an problema ta mayo kita nin fabricantes nin mga auto ta an gabos kaiyan guibo pa sa abroad, America, Hapon, Alemania asin Korea. Kaya nagyayaraman an ibang nasyones na paraguibo nin sasakyan pero an mga Pilipino consumedores sana.

Igwa man kuta na kita nin mga dyip na an kaha guibo digdi sato pero gusto pang ribayan sa ngaran nin modernisasyon. Kadakul na madudunong na mga Pilipino, mga imbentor asin sayantipiko nin maski anu-ano pero kun may brilyanteng kaisipan ipinapabakal an ideya sa iba huli sa dakulang kuarta. Kaya kitang Pinoy halawig pa seguro an panahon na magtitirios-tios ta talagang habo taman na mag-asenso ta masupog sa satuyang mga among sa America, sa Hapon, sa Alemania, sa Korea asin sa Europa.