Hagad sa paraoma ipabakal sa NFA an inaning mga paroy

Sa tahaw kan rinibo nang sako nin NFA rice an pigluluwas hale sa mga bodega kan ahencia kasunod kan Food Security Emergency kan Department of Agriculture, an NFA Bicol liwat nag-eengkaminar sa mga paraoma na ipatungod sa sainda an inaning paroy mantang mas halangkaw an presyo kun ikukumpara sa pribadong kumprada.

Si Acting Regional Manager Julie Llenareses nagsabi nagrarani na an bulan nin Mayo 2025 o panahon nin aranihan nin paroy an mga paraoma ngunian na saguli nganing makabawi sinda sa gastos huli ta binabakal kan ahencia sa cantidad na Php24 an cada kilo.

Target kan ahencia na maka-stock nin ribo-ribong sakong bagas bilang pag-andam sa panahon nin calamidad.

Poon na iimplementar kan gobierno an ''Agricultural Tariffication Act’’ kan taon 2019 sa panahon ni dating Presidente Rodrigo Duterte prohibido na sinda magsuplay nin NFA rice sa mga mercado.

An ley nagsusugo sa NFA na mag-stock sana nin paroy bilang pag-andam kun iguang calamidad na iyo man an saindang pinapabakal sa mga LGUs para sa relief operations sa mga apektado nin calamidad.

Poon na magdeclara nin FSE for rice an mga sanga kan NFA Bicol sa provincia nagsusuplay na nin bagas sa mga LGUs nganing ipabakal sa baratong presyo sa tahaw kan nagparalangkaw an presyo nin bagas sa mercado.

Apat sanang provincia sa Bicol kaayon sa pigdeclarang FSE for rice kan opisina sentral kan ahencia na kinababalehan kan Camarines Norte, Camarines Sur, Sorsogon, asin Masbate alagad dai kabale an Catanduanes asin Albay.

Huli kaini, an NFA Bicol nag-aviso sa LGUs sa duwang provincia na magcoordinar sa Food Terminal Inc. asin DA nganing makabale sinda asin makinabang an consumedores na makabakal kan mas baratong presyo nin bagas.

An mga consumedores sa duwang provincia nagrereclamo man sa halangkaw na presyo nin bagas sa mercado.