HONORABLENG BUAYA

Tigsik ko an tanggurangan sa politica

An pagkasablok grabe talaga

An trono sa mga aki ipinamana

Political dynasty sagkod ngonian yaon pa!

Tigsik ko an magulang na si Daddy

Sablok sa poder bilog na family

Pigtambodan sulog na aking lalaki

Aw ta ogmahon an mga bobotante!

Tigsik ko an mga agit-agitan

Harayo pa ngani an pirilian

An lusbot garo nang pigsisilihan

Grabeng hisdol, sobra an alimpasay!

Tigsik ko ining burubuaya

Nakatana kan kwartang inalamusa

Nanaging paslo, nagtandayag na

Ngonian saro nang higanteng buaya!

Tigsik ko an sagradong buaya

Mantang an milagro sobra-sobra

Dagsa an mga tawong nagsasamba

Ginibohan nin rebulto sa plaza!

Tigsik ko an honorableng buaya

An pakaatado ayos talaga

Wow, an ngudoy naglalanalana

Panremate an porma, nakakurbata!