HULI SA EL NIÑO: Danyos sa agrikultura sa Bicol naglangkaw 504%

Pili, Camarines Sur --- Sa laog nin sarong bulan marikas na naglangkaw nin 504 por ciento an danyos sa produkto agrikultural sa Bicol huli sa epekto kan El Niño phenomenon mantang apektado digdi an 983 na mga paraoma.

Kan Marso nasa P70 milyones an danyos sa omahan paroy alagad sa pinakahuring datus kan Department of Agriculture suminakat sa P353,978,513.60.

Sinabi ni Lovella Guarin, opisyal na parataram kan DA Bicol maabot na sa 8,222 hektarya rice area an mga apektado asin iguang production loss na 13,506 metrico tonelada.

An DA padagos na nagtataong asistencia sa mga apektadong paraoma na rehistrado sa Registry System for Sectors in Agriculture (RSBSA) alagad pig-eenganyar kan ahencia an paraoma na magrehistro sa Philippine Crop Insurance Corporation (PCIC).

Sa pinadarang datus kan DA Bicol kabali sa mga provincia na dakula na an danyos iyo an Albay – P80,959,420 sa mga banwaan kan Libon, Pio Duran, Jovellar, Polangui, asin Ciudad nin Ligao; sa Camarines Sur – P50,103,088 na apektado an 933 hektarya saka 1,340 paraoma sa Libmanan asin Pamplona; sa Masbate – P191,100,604 sa pitong banwaan asin 3,751 hektarya; saka sa Sorsogon – P30,815,400 sa Castilla sa 382 hektarya.

Afuera kan danyos sa paltik maabot sa 1,050 hektaryang omahan nin paroy asin mais an apektado man nin peste.

An mga tiniripon na report sa danyos kan paltik base sa pinapaabot sa opisina rehiyonal kan manlaen-laen na Municipal Agriculture Office (MAO) kan LGUs alagad posibleng magdugang pa an damage report hali sa iba pang mga opisina kan MAO digdi sa rehiyon cinco. (dpa)