HUYOM SA KABAONG

Tigsik ko an ngaran na kagadanan

Kun oras mo na nunca mong malilikayan

Magtago ka pa sa lusbot kan saimong Nanay

Seguradong hahapiton ka ni Kamatayan!

Tigsik ko po ai Miguel Fundador

Sa irinoman pirming na sanang rutoy

Nalango bakong sa arak kundi sa pagsumsom

Inatake kan hayblad, duwang bitis napongpong!

Tigsik ko man an Funeraria Imperial

Magpoon kaito hasta sa kagadanan

Sa Bicol pirmi nanggad number one

Apesar mayong promong Buy One, Take One!

Tigsik ko dakol na kalalakihan

Mayong kalag na pig-aataman

Tolong beses sanang minalaog sa simbahan

Bunyag, kasal, pagpahumale sa kinaban!

Tigsik ko po an kapeng barako

Da best na ka-jamming sa mundo

Aga, banggi, o kaya pagkaodto

Dawa pa sa saimong lamay kaibahan mo!

Tigsik ko man ining puting balloon

Pagkamoot saimo, dayaday, liputokon

Ihahatod ka hasta sa panganuron

Mientras na nakahuyom ka sa kabaong!