Imbitado ka Palan sa Meeting, Compadreng Ernie

MAG POON sa petsa 11 abot 18 kan Agosto, 2024 igwa po kitang dakulang selebrasyon na inaapod na Rigmat Arts and Cultural Fest. Fiesta ini kan mga nasa sining asin cultura kan satuyang An Maogmang Lugar na Naga. Bukas ini sa gabos. Dagos po kamo gabos.

Gigibohon ini sa man laen-laen na lugar igdi sa Naga arog kan sa UNC, Jesse Robredo Museo, Colegio de Santa Isabel, Ateneo de Naga, Naga City Museum asin iba pang lugar.

Igwa po igding mga pasali sa entablado, pagtiripon sa letiratura, karantahan, rawit dawit, mga banda, baraylehan, mga pelikula, Tanog Bikol kan Bikol Vibes, Avex Art Fair, Tour of Naga, mga tawong mapa liwanag manungod kan mga traditiones asin kultura ta asin dakul pang ibang actividades.

Duman po sa mga estudyante, may mga laen laen na tema arog kan kun estudyante ka nin arkitektura o bago kan graduado sa liniang ini, may pigaapod na Runa Exhibit na kun sain kamo pwede mag partisipar sa pag desinyo kan futurong Naga.

Kadakul pong mga mangyayari. Hapoton ta po si Vic Nierva na iyo an presidente kan Naga City Arts and Culture Coalition. Gabos pong hapot nindo masisimbag niya.

Pwede man kamo mag hapot diyan sa Jesse Robredo Museum, Naga City Museum, o sa City Hall kun ano an mga actividades ninda sa Rigmat Festival.

Saro sa mga mangyayari, na gigibohon sa Instructional Media Center kan Ateneo de Naga sa petsa 14 kan Agosto, iyo an inaapod na Aureus Retro na pag umaw ki depuntong Dr. Carlos Ojeda Aureus na sarong profesor asin parasurat na nagpa sikat kan Naga – na inapod ta man na Puso nin Bicol o An Maogmang Lugar, sa libro na Nagueños. Sa okasion na ini magkaka igwa nin inaapod na forum o mga iristoryahan manungod sa mga karacter na binuhay ni Carlos sa librong ini.

Naimbitaran man po ako na mag taram nin dikit sa paagi nin video ta yaon ako digdi sa NY ngunian. Mataram ako manungod sa OBikoliana ta miembro ako kan OBikoliana asin mataram man ako manungod sa tugang ko na si Carlos.

An OBikoliana sarong lugar sa Ateneo library na manungod sa pag preservar kan mga cultura, traditiones, lenguahe, asin historia kan Bicol. Nagtatao man an OBikoliana nin mga lectura para sa pag uswag kan Bicol.

Kan aldaw na ginibo ko si video nasambitan ko si ngaran kan saro kong compadre, dating kaklase, asin haraning amigo kan pamilya – Ernie Verdadero.

Nasambitan ko an pangaran niya ta siya an nag gaha o nag imbento kan titulong OBikoliana na hale sa pangaran kan samuyang dating padangat na maestro na si hesuitang padi na si James O’brien. Sabi niya OB ngaya ta hale sa O’brien, tapos Bicol na baga daa kaya OBikoliana!

Kan aldaw na ginigibo ko si video mayo akong pagka aram na nag paaram na si compadreng Ernie. Na araman ko lang ini pag mata kong amay kan sunod na aldaw ta may mga mensahe na ako sa cell phone.

Kan mga naka aging sunod-sunod na bulan, nagadan enot si padangat kong primo na si Nilo Aureus na publisher kan Bicol Mail asin may sadiri kan Goldprint Publishing. Sinundan ini kan sakuyang padangat na tugang na si Carlos. Saro siyang dating profesor asin parasurat.

Sunod na bulan nagadan si Jun Aureus na dati man na publisher. An mga ama mi na Nilo asin Jun magturugang. Ngunian sinundan ini ni compadreng Ernie na para surat sa Bicol Mail. Garo man lang siya tugang ni Nilo ta pirmi sinda magkairiba kan buruhay pa sinda. Mas dakul pa nganing midbid si Ernie na mga Aureus kaysa samuya kaya garo man lang kami mag turugang.

Si compadreng Ernie dating alcalde sa Milaor, board member kan probinsyang Camarines Sur asin amigo kang gabos maski anong partido.

Iyo ini an tawo na pwedeng maski ngani magkalaban kamo sa politika pero mantinido niya na mag amigo kamo pirmi sa personal na buhay. Amigo po siya asin midbid kan gabos. Marhay po siyang tao maski kaidtong nasa high school pa kami.

Arog po kaini an sarong eksperiensya ko saiya kaidto. Nag uulay-ulay kami kaidto duman sa may uma sa likod kan Ateneo sa kataid kan kawatan nin softball. Duman sa sadit na umang ito may sarong aking nagbabantay kan saindang damulag na nagsasabsab sa doot duman. Tapos, bigla na lang nag huramentado si damulag na sinusuag na si aki. Nahiling ini ni Ernie. Pag salingoy ko paka apod ko kan si mga ibang naka istambay duman nganing mag tabang, mayo na si Ernie, yaon na siya duman sa kataid kan damulag na pig aalaw niya kan bado niya nganing mag rayo si damulag sa aki. Na salvar niya tulos si aki sa peligro.

Iyo ini si Ernie. Kun kaipuhan ta nin tabang yaon siya pirmi. Mayo nang harapotan o arapudan.

Dakul man po kaming eksperiensya kan HS pa kami. Pareho po kami miembro kaidto kan Barlin Debating Society. Makunswelo ta serioso siya pirmi sa klase kaya kan nag debate sinda ni Monlee na komediano asin siya na serioso, maogmahon asin pambihira si debate,

Ngunian kan naghilingan kami sa Amerika paka tapos nin mga perang dekada, sabi niya siya na daa an nagpapa ngisi ngunian ki Monlee. Kan nagkaibanan kami kan pag puli ko kan 2018, sa duwang aldaw kong pag bisita sa Naga, magkaiba kami pirmi kairiba kan mga para pangisi ming mga kaklase na arog ki Jorge Caudilla asin iba pa.

NAKAKA PUNGAW ta plano ko mag puli sa Pebrero 2025 Padi. Pag naabot ako kaidto sa Naga pirmi ka na bisita sakuya. Pirmi ko man ika hinahanap. Nagtuturu an luha ko ngunian pero dae ako nasusupog. Bihira an mga amigong siring saimo.

Ngunian, ako na an ma bisita saimo pag mapuli ako. Arog kan tradisyon ko na pag napuli ako binibisita ko nguna si mga lubungan kan mga harani sa puso ko.

Paaram compadre, siguro naimbitaran ka sa convention dyan sa Pinaka Maogmang Lugar. Meeting kan mga parasurat, mga publisher, printer, kabali na man siguro duman si parasurat na dae pa man nahahaloy diyan na si Conrad na amigo man nindo. Presente man diyan si Fr. Obrien na binansagan mong OBikoliana. Tamang tama - siya an ma misa bago mag poon an conferensya nindo.

Kulibat ko palan, madali na naman an fiesta kan satuyang Ina. Sigurado ako magayon an view nindo dyan sa sakay kan fluvial ni Ina. Pero ma uuri kamo ki Carlos ta si Carlos nagpa budbud kan dikit nyang abo dyan sa may doongan kan pagoda ni Ina sa Bicol River nganing mas magayon an view niya.

Mano, Compadre, Kaklase. Viva La Virgen!