Inauguration, turn-over kan tourist rest area ginibo
Ni Sonny Malate
San Jose, Camarines Sur --- Ginibo kan nagtalikod na semana an inagurasyon asin turn-over kan San Jose Partido Tourist Rest Area. Pinakaenot sa Bicol, ini naconsiger kan local na gobyerno sa paagi kan Department of Tourism (DOT) asin Tourism Infrastructure and Enterprise Zone Authority (TIEZA).
An structura yaon sa compound kan Sitio Talisay, Barangay Dolo, kun saen namumugtak an tourism hub na inaapod “Talisay, A New Important Place.” Ini may budget allocation na P10M.
Ini harani sana sa Partido Boulevard na naghahanggilid sa kadagatan kan Sagñay, Tigaon saka San Jose. An 14- kilometros na coastal saro naman na tourist attraction ngonian.
Si Alkalde Jerold B. Peña dakula an pasasalamat asin orgulyo na an saiyang banwa iyo an primerong local government unit (LGU) sa Rehiyon V na nagin recipiente kan arog kaining proyekto.
Nanotaran ni Peña na bako sanang an San Jose kundi an iba pang localidad sa Camarines Sur asin magin sa Kabikolan an makikinabang sa tourist rest area. Pigbanggit niya na ini macomplemento sa pagparambong kan turismo, cultura asin economia kan rehiyon.
Nagin presente sa inagurasyon saka turn-over event iyo sinda DOT Secretary Christina Garcia Frasco, Cong. Arnie B. Fuentebella, DOT-Bicol Regional Director Herbie Aguas.
Si Sec. Frasco nagpahayag na an DOT padagos sa pagconstruir nin mga tourist rest area sa man-iba-ibang lugar sa bilog na nasyon sa kamawotan na orug pang mag-uswag an industria kan turismo.
Siring man, yaon an mga oficiales kan Partido District asin mga LGUs asin man-iba-ibang representantes kan pampublico asin privadong sector.
An San Jose Partido Tourist Rest Area na may duwang eskalon prominenteng nakatugdok harani sa Lagonoy Gulf. Ini iguang mga amenities para sa comfortable asin convenienteng pagdagos digdi kan mga local asin dayuhan na mga turista.
Kairiba sa facilidades digdi iyo an comfortableng kuwarto, restaurant asin lounge/cafe, pasalubong center, child/mother asin pwd facilities, rest room; charging area asin iba.
Mientrastanto, sa maabot na mga bulan sunod naman icoconstruir sa tourism hub iyo an Fitness Park, Community Plaza, Terminal asin Fish Market.
Magkakaigua pa man nin higanteng estatwa si Nstra. Sra. Virgen de Peñafrancia. Ini an piglalaoman na maserbing dakulang religious landmark asin centro nin devotion ki Ina mantang nagkakaigua nin maritime asin fluvial procession cada Septiembre sa parroquia ni San Padre Pio na nakakasakop kan mga barangay harani sa San Jose Partido Rest Area.
Piglalaoman na an tourist rest area an macomplemento sa orug na pagpagantad kan turismo sa Bicol oras na magkatotoo na an pighahasing airport ni Congresista Fuentebella sa banwaan kan San Jose.
Comments