Inday Sara

Dai ko maibitaran na ikumpara si Inday Sara ki dating Bise Presidente Leni Robredo. Habo ko man kutang gibuhon ini ta sabi ngani sa English “night and day” an pagkakaiba kan duwang babaeng politiko pag-abot sa kun siisay talaga saindang duwa an may puso para sa mga tawo saka kun isay an anas lang porma.

Kan nakaaging semana, mientras na binaha an enterong National Capital Region pati an mga hararaneng syudad o probinsya dara kan bagyong si Carina, si Inday Sara naglupad paduman sa Germany kaibahan an saiyang pamilya.  Biglang binayaan nya an mga Pilipino sa tahaw kan saindang pagtios. Personal trip daa asin haloy nang naka-plano an  pagbiyahe kan saiyang pamilya. Anong klaseng lider yan? Minaluwas na mas importante ki Inday Sara an personal nyang interes keysa an interes kan kadaklan.

Mala ta sagkud ngunian dai pa baga nagtataong eksplinasyon si Inday Sara kun pano nya ginastos an P125 milyon na confidential funds na naubos sa laog nin onseng aldaw kan 2022. Siguro lista na naman ini sa tubig.

Alagad si Leni nag launch tulos nin “massive relief drive,” kaibahan an Angat Buhay na saiyang programa para makatabang  pag may kalamidad lalo na sa mga inaapud na nasa laylayan.

Gulpihon pa akong gustong isurat kun tano mas marhay asin mas epektibong bise presidente si Leni kumpara ki Inday Sara, pero sa masunod ko na sigurong mga artikulo sasabihon.

An gusto kong tawan importansya sa artikulong ini iyo an nabasa ko sa mga diaryo kan sarong aldaw na inakusahan ni Inday Sara nin “political harassment” an liderato kan Philippine National Police (PNP) na pinamamayuhan ni Gen. Rommel Marbil.

Anggot si Inday Sara ta pig-recall an 75 na pulis na nagtatao saiya nin seguridad o proteksyon. Dara kan desisyon na ini, nagin mas delikado daa ngunian an saiyang buhay pati an buhay kan saiyang pamilya.

Segun ki Inday Sara, “Isa lang ang hiling ko sa inyo – ang kaligtasan ng aking pamilya. Huwag ninyong payagan ang anumang karahasan sa aking ina, asawa at apat na anak, personal man o sa internet. At kung sakali man, huwag ninyong palampasin ang sinumang gagawa ng kapahamakan laban sa kanila.”

Anong peligro sa pamilya an sinasabi ni Inday Sara? Ano an ikinatatakot nya? Siguro gulpi syang naginibong kasalan sa mga tawo kaya arog na lang kaiyan an saiyang takot.

Pig-eksplikar ni Gen. Marbil na may 106 na pulis na naka-assigned ki Inday Sara. Kaya maski 75 an pig-recall, may 31 pang pulis na nagtatao saiya nin proteksyon. Tano kulang pa giraray yan?

Segun sa Commission on Audit (COA), sa 683 personnel na naka-assigned sa OVP (Office of the Vice-President) kan 2022,430 an naka-assigned sa Vice-Presidential Security and Protection Group (VPSPG).

Kumpara ki Robredo, naglangkaw pa ngani nin 78 porsyento an militar na naka-assigned ki Inday Sara para sa proteksyon nya asin kan saiyang pamilya.

Sa hiling ko, maski na-recall ang 75 na pulis na naka-assigned ki Inday Sara, kadakol pa man giraray an mga militar na miyembro kan VPSPG na nagtatao saiya asin sa pamilya nya nin proteksyon o seguridad.

Kaya an reklamo ni Inday Sara na hina-harass sya politically asin mas nasa peligro an buhay nya saka kan pamilya nya ngunian mayong basihan – pa-herak effect lang.

An hiling ko ki Inday Sara talagang “spoiled brat.” Garo aking sadit na nawaran lang nin nagkakaperang tsokolateng dulse naghihibi na. Kun ano-ano na an sinasabi o nirereklamo. Gusto nya pirming nasusunod an saiyang kagustohan. Empowered an paghiling nya sa sadiri kaya feeling nya dai sya accountable. Mas lalong pang duminakula an payo kan nagin bise-presidente

An problema luminaog pa sa eksena an mga mapopormang kaalyado ni Inday Sara sa Senado na si Bato de la Rosa asin si Robinhood Padilla. Pig-angat ni Bato an mga retiradong militar asin kapulisan na boluntaryong protektahan si Inday Sara pati an saiyang pamilya. Nagpasikat man si Robinhood asin pig-angat man an mga dating rebelde na protektahan si Inday Sara.

Ay buhay politika sa Pilipinas. Anas pa-pogi points. Anas pansadiring interes. Anas karampihan maski sarala an kinakampihan. Anas kaplastikan. An kadaklan sa satuyang mga “your honor” sa totoo lang mayong “honor.”