Insidente nin kasulo sa CSur nagbaba sa 40%-BFP
Nagbaba sa 40 por ciento an mga insidente nin kasulo sa Camarines Sur kan bulan nin Enero saka Febrero ngunian na taon kumpara sa kaparejong bulan kan 2024.
Ini an kinumfirmar kan Bureau of Fire Protection (BFP) sa paagi ni FO2 Janine Rapadas an opisyal na parataram kan ahencia base sa saindang listahan nasa 70 an nangyaring insidente nin kasulo kan kaparejong bulan kan nagtalikod na taon 2024 kumpara sa 42 ngunian na enot na duwang bulan kan 2025. Nag-abot sa Php33-M si danyos kan 2024 mantang ngunian na 2025 nag-abot man sa Php11-M.
Kadakli sa nasulo mga harong mantang an causa kadakle sa electrical connection asin appliances.
An pinakadakulang kasulo iyo si nangyari sa saodan sa centro kan Sipocot, Camarines Sur kan Febrero 25, 2025 na uminabot sa 31 stall owners an nawarang nin puesto alagad an lokal na gobierno sa pamamayo ni Alcalde Tom Bocago nagtao na nin temporaryong lugar nganing magpadagos kan saindang negosyo. Mayo man pig-report na nalugadan o binawian nin buhay sa sinambit na insidente segun sa BFP Sipocot.
Sinabi pa kan BFP Camarines Sur na padagos an saindang kampanya sa publico sa paglikay sa kasulo kabale na an pag-organisar nin Fire Community Group asin pagdistribuer nin fire safety kits.
Ngunian na Fire Prevention Month an lambang BFP sa mga municipalidades padagos an saindang kampanya para sa fire safety sagcod sa mga barangay.
Mientras tanto, nagpapatanid pa an BFP kan provincia na maglikay sa nagpapamidbid na LGP inspector kan saindang ahencia alagad nag-aalok na ma-inspeksyon kan saindang tangki sa pagluto asin mapabakal nin mamahalon na fire safety devices alagad feke saka mahal an presyo na nagcacantidad nin dos mil hasta onse mil de pesos.
Mayo sindang personajes na nag-lilibot sa mga residential houses nganing magheling asin mag-survey kan mga ginagamit sa lutoan kun igua man iyan fekeng personajes kan BFP. Hagad kan ahencia na isombong tolos sa PNP asin BFP.
Comments