Kaidto Masiram An Bagyo

Dai ko na kaipuhan pang iistorya digdi an mga makuring katakutan asin kasakitan na inagihan kan satuyang mga kahimanwa sa nagtalikod na bagyong Kristine. Nagdakula ako sa harong na gibo sa kahoy asin tiklad na mayo nin nakatakod na koryente kaya an samuyang ilawan iyo an gasera sana. Arog kan mga aki kan panahon, kung igua nin bagyo, orogmahon na tiripon sa laog kan saka asin nag iirestoryahan ta pinapabayaan si Tatay sagkod sinda Kuya na iyo an mag gakod kan harigi pasiring sa kataid na poon nin kahoy tanganing dai matumba ang harong. Dai pa kaidto uso an mga rescuers ta an mga Barrio officials dai pa kaiyan tatao ta mayo man ngani sinda nin toltol na Barangay Hall. Kung makusogon an bagyo arog kan pig aanuncio kaidto sa DZRB asin DZGE lalo na an mga bareta ni Rufo Tuy asin ni Eddie Alanis, kaibahan an mga sikat na announcer na sinda Fiorel Salvo, Jun Lagrimas, asin iba pa, nag iisip na an satuyang mga magurang kung kiisay na bungalow makiki dagos asin makikiturog kaibahan na an pamanggihan asin pamahawan. Gusto kong sambiton digdi an mga familya na samuyang pinag dagusan kung makusog an bagyo, arog kan familya Garchitorena, Familya Tandog, asin family ni Dr. Manuiel “ Boy” Dizon. Kan ako solterito na, nag istar ako sa Daughters of Mary sa atubangan kan Ateneo de Naga, asin kan panahon na idto iyo man an pag agi kan makusogon na bagyong Sining kun kaya kinaagahan pig tugon ako ni Sister Superior Therese na darahon ko sa familya ko an mga tinapay, hopia, na yaon sa Ateneo Canteen dagdagan pa nin mga gatas na hale sa US food aid. Sa pag abot ko sa lugar mi, an samuyang harong nadadatugan nin sarong kaatupan nin sarong konkretong harong na dai mi aram kun sain hale, asin iyo idto an samuyang ginamit para mairahay an samuyang harong. Orogamaghon an mga aki pagkatapos kan bagyo ta nagkakaigua nin sapa an samuyang baryo kaya kadakol an nagkakarawat, nagraralangoy asin nag rurulunad sa barza ta malinig an tubig mayo nin laboy. An mga pamahawan kan mga tawo iyo an pinakro ta kadakol an napukan na mga batag, bihira kaidto an casualty ta bihira an pag langkaw nin tubig bakong arog ngonian na kung may bagyo, an pagbaha asin landslide an kinakatakutan. Ngonian, kaipuhan akoon niyato an realidad na sa kada pag bagyo, kakabit an makatakot na pagbaha na iyo an mas dakul na peligro sa satuyang buhay. Makanood na kitang mag asikaso mantang harayo pa an bagyo, ugalion an maghanap nin malilipatan na pusog asin salbado asin malikayan an peligro sa buhay.