Kalinturado na iguang sintomas nin dengue magpakunsolta-DOH

Nagpaluwas nin patanid an Department of Health (DOH) Bicol sa publico na sa laog sana nin duwang aldaw kinakalintura an sarong pasyente saka nakakamate na nin sintomas dapat darahon na sa doktor nganing ikunsolta o sa pinakaharaning health center para maaraman kun positivo na sa helang na dengue.

An casong dengue naglalangkaw na sa ibang rehiyon mantang an DOH Bicol naghihiro na para malikayan an paglangkaw kan caso orog na sa mga barangay.

Kun malala na sa dengue an pasyente, segun sa DOH ini nakakagadan. Ini dara kan lamok na Aedes aegpti na madaling magdakul sa tubig asin sa maramog na lugar.

Hinagad kan ahencia na regular na maglinig sa kapalibotan sa luwas asin sa laog kan residencia nganing mayong mag-estar na dengueng lamok.

Padagos an saindang advocacia sa 4S: Search and destroy, Seek early consultation, Self-protection Measures, saka Sa Yes to Fogging.

Igua nang kasugoan an ahencia sa mga City and Municipal Health Officers sa rehiyon na magcampanya laban sa paglakop kan dengue sa mga barangay.

Kaipuhan digdi an cooperasyon kan lambang opisyales lokal para sa proteksyon sa salud kan saindang constituentes.

Sa report sa DOH central office an mga lugar na igua nang halangkaw kan caso iyo an Ciudad nin Quezon, naglakop naman sa tolong rehiyon kan V-A, III, asin NCR.