Kasaradayan o kasaraditan (Part II)

Si depuntong barangay kapitan Ricardo T. Gavino kan San Antonio, Milaor, honors section sa Ateneo kan dekada 60, naguin battalion commander kan Ateneo PMT, kaklase niya si Congressman Sal Fortuno, Charles Honorio, Monico Imperial Jr, Fiscal Agapito Gonzales, artist/educator Jerry Gumba na gabos nagpadagos pag-eskwela sa kolehiyo pakatapos high school pero si Rick nagpuli sa baryo asin nag- uma asin nagserbe sa barangay bilang ehecutivo.

Si Jaime G. Arejola, valedictorian kan batch 64 kan Ateneo de Naga high school na konsiderado kaidto ni Fr O’Brian na the best class durante kan saiyang panahon. Nag-eskwela sa Ateneo de Manila University ka batch sinda First Gentleman Mike Arroyo, Atty. Teddy Cruz, Congressman Cho Roco pero dae nungka naghagad pabor sa saiyang kataid sa tukawan sa Ateneo de Manila kan maguin presidente kan Pilipinas si GMA. Si Jimmy aktibista kan kapanahunan niya pero sarong member kan Khi-Rho Movement kaibanan niya si kan juven pa si Obispo Bong Baylon kan Legazpi. An saiyang propesyon naguin permanenteng caregiver kan saiyang mga magurang asin mga tugang.

Si kapitan Raul Repane, kapitan sa barko, mayamanon na ngunyan asin may mga sadering harong asin apartments na paarkilahan sa Naga. Kan panahon niya sa high school sa Ateneo de Naga komikero siya asin dating parabutong nin butakal na nagsasagbat sa mga anayon bilang hanapbuhay niya kan siya aki pa.

Si Mr Stephen Austero Diaz, 89 anyos, retiradong maestro sa high school asin matibayon sa Mathemetics, kan siya maestro sa Milaor High School asin sa Anglo sa Naga. Nagbutong man siya nin butakal na pighahatod sa mga kleyente, naguin retratista pa asin perming ganador sa jueting, para sigarilyo kadto para siragilyo pa sagkod ngunyan. May tolong aking nurses sa America saka sarong manager kan Landbank sa Naga. Mabagsik pa an saiyang lawas asin sabi ngani kaiyan an piyesa kan saiyang hawak export quality.

Balik-balik sa America asin Pilipinas.

Si Pete Servano, trader kan high school asin tambay sa Santa Cruz, Naga kan madiskubre ni Alex Abad asin Roger Tormes, pigrecruit sa Khi-Rho Movement, pigrecomendar sa ABS CBN bilang librarian and the rest is history.

Si Jenis Nidea na trader man kan high school. Naguin point-man kan DA kan panahon ni director Fe Laysa na saiyang prima, guinibo siyang liason-officer sagkod na magretiro. Ngunyan saro na siyang poderoso asin matinabang na miyembro kan sarong sikat na party list.

Si Jimmy Veneracion, retiradong banker, dating editor kan “Maogmang Lugar” pataratambay na lang sa SM asin palakaw-lakaw sa Villa Corazon Subdivision.

An mag-agom na si Judge Junet Ayo asin an agom na si Nonie Salvador Ayo segi na lang relibot sa kinaban nagbibisita sa mga aki asin makuapo. Dating mga simpleng mga tao simple man guiraray sagkod ngunyan.

Si Jen-Jen Baldemor, CPA aki ni Ompong yaon lang sa laog kan harong nagnenegosyo pero segi an hibog kan saiyang libro de banko.

Si Aida Santiago table tennis champion sa boxmate kan panahon, retiradong manager kan Guevarra Enterprises sa Naga ngunyan palibhasa lebo siete na segi na lang basa-basa nin diaryo lalo na an Bicolmail.

Si Vic Lim retired commercial artist asin esposo kan personnel officer kan CBSUA, nag-aaling-aling na lang kan makuapo sa saindang harong.

Si Engr Jun Adriano dating konektado sa BRBDP yaon na sa Canada darakula na asin propesyonal na an mga aki kaya buelo na siyang magbiyahe sa ibang parte kan kinaban.