KKK magiging envuelto sa kampanya vs kriminalidad

Magiging envuelto na an mga jovenes sa Kabikolan sa kampanya sa kriminalidad kasunod sa pagkakabilog kan Philippine National Police kan Kabataan Kontra Kriminalidad (KKK) na kumpuesto na nin 3,191 na miembrong jovenes.

Sinda magiging katuwang kan mga awtoridad sa crime prevention sa saindang mga comunidad nganing kaskas na makaka-responde tolos an kapupulisan asin an opisyales de barangay.

Si regional director PBGen Andre Dizon kan PNP Bicol nagsabi an programa piglansar sa manlaen-laen na provincia kan Bicol na saiyang hinagad sa mga jovenes na maging activo sa kampanya sa paglaban sa kriminalidad asin seguridad nganing maging matrangkilo an saindang comunidad.

An KKK may objetivo na maglansar kan saindang actividades laban sa kriminalidad sa pagtarabangan kan mga lokal na awtoridad na may kakayahan na ipaabot tolos an ano man na nangyayaring krimen, ilegal na actividades, asin mag-envuelto komo masinudsunod sa ley.

Sinda komo futurong lider sa nasyon, dapat lang maging activo sa pagtulod kan paz y orden sa paagi kan saindang iniciativo natatawan sinda nin halaga sa comunidad sa paninidugan na labanan an ano man na kriminalidad, sabi pa ni Dizon.

An organisasyon na ini nin jovenes dakulang bagay na padagos mamamantenir an katrangkilohan sa rehiyon mantang naglalaoman an PNP Bicol na magiging activo an grupo bako lang sa pagbilog kan grupo.