LANDO BICOLANO

Tigsik ko an Daragang Magayon

Abaa nang hamis kan huyom

An kuwintas siling maharangon

An palda alang na dahon kan natong!

Tigsik ko an maisog na si Handiong

Pitong dagat an saiyang linangoy

Sinabat an kikilat, buhawi, dagokol

Mahiling sana an Daragang Magayon!

Tigsik ko ining si Isang Irog

Halawig na taon nanok an turog

Nene, Nonoy, dae po magpararibok

Kun siya mapagimata kita mabuklos!

Tigsik ko an Salog kan Naga

Pano nin kolor, tagob nin istorya

Dalan ni Ina, Virgen de Peñafrancia

Kami panong ogma, VIVA! VIVA! VIVA!

Tigsik ko an calesa sa Naga

Maogmahon kan ako aki pa

Ngonian ako napupungaw, haen na?

Padikitdikit nawawara na!

Tigsik ko si Lando Bicolano

Kun mamomoot, liputok, totoo

Mainit! Biyong nag-aaraso

Garo nang siling rimorimo!