LGU Lagonoy nagparticipar sa DTI Trade Fair

LAGONOY, CAMARINES SUR --- Saro an local na govierno kan banwaan na ini sa mga activong nagparticipar sa ginibong limang aldaw na Feria de Camarines. May temang Nuevo Negocio, ini pig-initiar kan Department of Trade and Industry (DTI) Camarines Sur sa pamamayo ni Provincial Director Jay Percival Ablan.

An trade fair ginibo kan Noviembre 16 hasta 20 sa Robinsons Place ciudad kan Naga.

An actividad iguang objeto na parambongon an manlaenlaen na productos kan Micro Small and Medium Enterprises (MSMEs) na pig-asistehan kan DTI sa lindong kan 26 na Negosyo Center sa Camarines Sur na suportado kan mga local na govierno.

Sa paagi kan pag-encaminar ni Ms. Nica R. Clemeno, Business Counselor kan Negosyo Center Lagonoy, asin bilog na suporta ni Alkalde JB Pilapil, 11 mga local na entrepreneur asin sarong cooperativa an nagparticipar sa trade fair.

Segun ki Mr. Louie Perico, sarong empleado kan LGU Lagonoy asin entrepreneur, dakulaon an saiyang pasasalamat sa DTI Camarines sa oportunidad na itinao sa sainda sa paagi kan trade fair.

Nin huli sa trade fair an mga local na entrepreneur nakaguno nin halangkaw na benta kan mga producto ninda.

Nagkaigua man sinda nin access asin linkage sa ibang mga negosyante tanganing orug na mabisto asin magdakula an saindang sadit na negosyo.

An mga local na productos na gibo sa Lagonoy na makusog an benta iyo an mga native handicrafts asin mga pagkakan arog kan puto tabla, ampaw asin tsokolate na gikan sa cacao.

Saro sa producto na pigtampok sa trade fair iyo an samhod o soft broom. Ini gibo sa sugbo o tiger grass na bastanteng nagtutubo sa kabukidan na mga barangay kan banwaan na ini.

An samhod iyo an napiling producto kan Lagonoy sa One Town, One Product sa irarom kan DTI.

An samhod kan Lagonoy bistado na may marhay na calidad asin mabenta dawa sa ibang lugar.

An samhod orug na bistado huli sa Samhod Festival na nagtatampok kan productong ini.

Kan mga nagtalikod na taon sarong higanteng samhod an prominenteng nakalatag sa plaza sa atubangan kan edificio municipal kan banwaan na ini.

Ini bilang pag-orgulyo kan banwaan na Lagonoy sa mga namamanwaan asin mga dayuhan digdi.

Mga customer sa booth kan LGU Lagonoy sa trade fair kan DTI