LGU, PNP preparado na sapaz y orden sa Semana Santa

Calabanga, Camarines Sur --- Preparado na sa mga actividades an lokal na gobierno, MDRRMO, simbahan asin Municipal Police Station sa banwaan na ini ngunian na Semana Santa sa tahaw kan piglalaoman na ribo-ribong debotos ni Amang Hinulid an masungko orog na sa aldaw nin Viernes Santo.

Si Alcalde Eugene Norman Severo nagsabi na bulan pa nin Marso hasta Abril nagkapera na sinda nagkaigua nin miting para sa pagmantenir nin paz y orden asin sa bulos nin trafico na hale pa sa manlaen-laen na provincias asin ciudades na iguang debosyon sa Amang Hinulid.

An Bureau of Fire Protection, Public Safety Office asin iba pang ahencia katuwang kan LGU nganing maseguro an seguridad asin proteksyon sa debotos.

Taon-taon inaabot nin on milyon na mga debotos an nasungko sa Kapilya kan Hinulid na namumugtak sa Barangay Salud.

Nagpadara nin augmentation force an PNP Provincial Office nganing makatabang sa pagmantenir kan trafico mantang sa mga aagihan kan mapenetenciang debotos sa lugar kan Ciudad nin Naga, Canaman, Magarao asin Bombon may madedestinong kapupulisan nganing magpatrolya. Inaabot nin matangang banggui sagcod maagahon an halabang penetencia pasiring sa Kapilya.

Sa aldaw kan prosesyon sarado an mga aagihan na mayor na tinampo mantang iguang nakaantabay na mga awtoridad.