LGUs nag-ayuda nin rescue team sa ibang banwaan

Ni Sonny Malate

Huli sa pagmakulog sa makuring kamurogtakan kan mga apektadong residentes  kan bagyong Kristine sa pagtaraid na banwa, an nagkakapirang local government unit (LGU) sa Partido Area an nagresponde sa pangangaipo nin madalian na rescue operation sa mga lugar na binaha sa probinsiya kan Camarines Sur.

An Municipal Disaster Risk Reduction and Management Office (MDRRMO) kan mga banwang Tigaon, Goa, San Jose, Sagñay asin Lagonoy an nagpaabot kan saindang esfuerzos tanganing maibalyo sa salbadong lugar an mga biktima kan bagyo urog na sa mga banwa kan Bula, Nabua asin iba pang localidad sa Rinconada.

An kadaklan kan mga pigrescue an pigduholan nin pagkakan asin tubig mantang sinda halawig nang oras na nagtios nin sakit, gutom asin takot huli sa paglamasa kan bagyo. Sinda an nalaom sa mga harong o boarding house na saindang pigdadagosan huli sa paglangkaw kan tubig baha.

Dakulang numero kan mga pigrescue mga estudiantes na nakauruli sa ginikanan na banwaan sa Partido Area sa paagi kan mga vehiculo na gamit kan mga local na gobyerno sa mainland asin coastal area digdi sa pagtransportar sainda.

An bagyong Kristine an may daradarang makusogon na uran na nagcausa nin pagbaha sa dakol na parte kan Kabikolan. Ini an nakaparalizar kan transporte, serbisyo sa tubig, kuryente, comunicacion asin iba pang basic services nin nagkakapirang aldaw.

Sa presente, igua pang mga hararayong lugar sa coastal area kan Partido an mayo pang serbisyo nin kuryente hasta sa ngonian.

Sa datos kan PAG-ASA, nagluluwas na an pighugmak na uran kan bagyo kan Octobre 22  sa nagkakapira sanang oras an pareho kan  uran sa laog nin tolong bulan.

Huli kaini, nanotaran na sa probinsiya nin Camarines Sur, urog na sa ciudad nin Naga,  an tubig baha an tuminaas na maray. Durante sa kasagsagi kan bagyo may mga residentes digdi an nagtenir kun pirang oras sa itaas kan bubong kan saindang pig-iistaran na harong asin iba pang residential unit.

An danyos kan raot nin panahon an nagwalat nin nagkakapirang personang  binawian nin buhay asin dakol pang nawawara, dae mapag-araman an kamugtakan hasta ngonian.

Mientrastanto, arog kan mga nagin biktima kan bagyong Kristine sa ibang lugar, an mga namamanwaan sa Partido Area an luwayluway na nagbabangon sa tahaw kan danyos na winalat kaini.

Sa presente, an mga LGU digdi an nag-evaluar na kan pangkagabsan na danyos sa infrustractura, propiodad, agricultura asin iba pang sector kan communidad.

Kasabay man kaini, iyo an pagrevisar kan saindang mga equipaje, programa asin  pasistema durante sa panahon nin bagyo asin ibang calamidad tanganing urog pang maserbihan nin tama, efectivo asin marikas an mga namamanwaan.

MDRRMO Goa Rescue Team durante kan rescue operation sa Rinconada Area (Photo - LGU Goa)