LGUs sa CamSur na nasa GCQ hinigutan an health protocols
Nag-iimplementar na nin estrictong guidelines sa health and safety protocols an mga local IATF nganing iyo an sunodon kan saindang konstituentes matapos magpaluwas nin Executive Order No. 06 si Gobernador Migz Villafuerte na nagdedeclarang General Community Quarantine (GCQ) sa 31 municipalidades kan Camarines Sur puon kan Hunyo 18-30.
Mayoria kan LGUs sa Camarines Sur dai nagpapabor sa kahurotan kan organisasyon nin mga doktor sa Bicol na mag-aksyon na an national IATF nganing ipasa-irarum sa Enhanced Community Quarantine (ECQ) an rehiyon sa tahaw kan naglalala na an caso kan Covid-19 sagcod na napapano na an Covid-19 wards sa mga hospital.
Envez kan ECQ an Capitolyo Provincial nag-declara nin GCQ mantang an iba yaon sa lindong kan Modified General Community Quarantine (MGCQ).
Sa Calabanga, Camarines Sur na kabale sa 31 mga banwaan na nasa GCQ nagpaluwas nin direktiva an local IATF digdi sa pamamayo ni Alcalde Eduardo Severo nganing sarahan an municipal park asin Patio kan La Porteria Parish na parating pigtitiriponan kan mga tawo sagcod na dai nagsusuronod an iba sa social distancing.
Pinasarahan pa an mga billiard hall, mantang ibinabawal an paggamit kan basketball court sa Poblacion maging sa mga barangay asin kabale na an karaoke bar, ini sagcod na nasa irarum pa sa GCQ an saindang municipalidad.
An iba pang mga municipalidades na nasa lindong kan GCQ asin nagpanday na kan saindang mga estrictong guidelines sa implementasyon kan health protocols, kinababalehan kan Cabusao, Ragay, Sipocot, Milaor, Minalabac, Pamplona, Pasacao, San Fernando, Bombon, Camaligan, Canaman, Magarao, Ocampo, Pili, Caramoan, Garchitorena, Goa, Lagonoy, Presentacion, Sagnay, San Jose, Siruma, Tigaon, Tinambac, Baao, Balatan, Bato, Buhi, Bula, Nabua asin Ciudad nin Iriga.
An iba pang municipalidades kan provincia mantenido sa Modified General Community Quarantine. (dpa)
Yorumlar