LGUs sa Partido area nagtaas an income classification

Ni Sonny Malate

Nagtaas an income classification kan dakol na mga local government unit (LGU) sa bilog na nacion base sa pinakahuring income reclassification na ginibo kan Department of Finance (DOF).

Sa Partido Area, lima na gabos an 1st class municipality. Apwera sa Tinambac na dati nang arog kaining clasificasyon, apat pang mga LGU -  Caramoan, Lagonoy, Tigaon asin Goa.- an nagin  1st class municipality.

Base sa provisiones kan RA 11964 o Automatic Income Classification of Local Government Units  Act, an sarong LGU clasificadong 1st class kun an average annual income kaini minaabot sa P200,000,000,00. An ley may katuyuhan na maibusol an activong paagi kan  LGU para sa local autonomy asin kauswagan kaini.

Segun ki Domingo Q. Amata, Municipal Treasurer kan Goa, Camarines Sur, an pigcoconsiderar na centro kan progreso sa distrito kan Partido, nagseserbing moral booster sa mga oficiales kan LGU asin constituentes an pagkakaigua nin paglumpat sa income classification kan localidad.

Pigdagdag pa niya na an pag-awmento sa revenue kan LGU sa paagi nin sustenidong esfuerzos kan mga may katungdan sa local na gobyerno minaresulta sa dagdag na ginigikanan nin alokasyon para sa mga pangenot na serbisyo, infrastructura asin mga initiativa asin programa para sa karahayan kan mga constituentes.

Pigreconusir ni Amata an dakulang heras kan Goa hale sa National Tax Allotment na nakadagdag sa  income kan LGU na hale sa mga local na burabod nin revenue. 

Nanotaran man niya an resulta kan provisiones kan Mandanas Ruling kun saen may significanteng heras na nakukua an mga LGU hale sa gobyerno nacional. 

Pigbanggit  kan Municipal Treasurer na base sa Mandanas Ruling, iguang mga functiones gikan sa gobyerno nacional na ibinababa sa mga LGU kaya an heras na naguno hale digdi an minadalagan man sana para sa mga functiones na ibinababa..

An local na gobyerno kan Goa an sustenido sa esfuerzos kaini tanganing madagdagan an ingreso sa local na revenue. An LGU sa pamamayo ni Alkalde Alfredo P. Gonzaga III, katuwang si Bise Alkalde Antolin P. Respall asin Sangguniang Bayan an nagtutulod kan “Business Friendly” policy tanganing magrambong an economia.

Apwera kaini, an LGU padagos man na nagbubusol nin mga lakdang sa urog pang pagpabaskog kan mga actividades katakod sa economic enterprise asin ibang income-generating initiatives.

Kan primerong semana ngonian na Deciembre, an LGU Goa nakarecebi nin Certificate of Achievement gikan sa Bureau of Local Government Finance, Regional Office V; huli sa pambihirang  total collection para sa Business Tax, Charges and Fees asin Economic Enterprise.

Mientrastanto, si Amata an nagpagiromdom sa mga residentes na mag-aprobechar kan amnesty na pigduduhol kan gobyerno probinsyal para sa mga may babayadan sa Real Property Tax sa paagi kan Sangguniang Panglalawigan Ordinance # 68, s. 2024.

Siya nag-aviso sa mga nanunungdan na makipaghilingan sa personahes ninda hasta sa Hulyo 3, 2026 para makinabang kan kageanan na pigtatao kan gobyerno.

Piglalaoman na an pagtaas kan income classification kan mga LGU magigin contribuente sa  capabilidad kaini na maresulta  sa efectivong paggogovernar asin  progresibong localidad.

Goa Integrated Central Terminal saro sa ginigikanan nin dakulang revenue kan LGU. (Photo: Bicol Mail)