Live passion play tampok sa Semana Santa

Ni Sonny Malate

Kada Semana Santa dakol na mga tradisyon asin gawi-gawing relihiyoso an pig-oobservar sa bilog na nacion. Magpoon kaito sagkod ngonian ini buhay na buhay mantang an pagtubod asin pagsarig kan katawohan  sa Amang Kagurangnan pusog asin daeng kasagkuran.

Sa distrito kan Partido, tolong mga actividades relihiyoso an padagos na ginigibo kada Semana Santa asin nakakaguno kan atensyon kan residentes asin mga dayuhan - an live passion play sa banwaan kan Goa asin San Jose saka an Via Crucis  sa Canomoy, San Isidro Norte, Lagonoy, kun saen pigtuturowangan asin  pinapatindog an sarong higanteng cruz.

An live passion play sa  Archdiocesan Shrine and Parish  of St. Joseph sa banwaan kan San Jose nagpoon pa kan taon 1995 sa paagi kan mismong parroquia asin Parish Youth Ministry (PYM). Ini an reenactment o pagsadrama kan pagsakit asin dagos nang pagkagadan sa cruz ni Hesucristo. 

An passion play ginigibo kadaklan na vezes kada Mierkules Santo. Ini minapoon sa Patio kan simbahan, minalibot sa mga kalyeng pig-aagihan kan procession asin minatapos sa Patio man giraray, tampok an  dramatikong pagpako sa cruz ki Hesucristo.

Segun ki Manuel D. Moranda, Adviser kan PYM, dakulaon na bagay para sa miembros digdi an matukahan bilang Biblical character o dawa kabale sa support group sa paglatag kan live passion play. Sa paagi kaini, orug na nagigin pusog asin hararom  an saindang buhay espiritual asin relasyon sa Mahal na Dios.

Sa taonan na presentasyon kan passion play, inako ni Moranda na siya mismo napapaluha sa mga eksena digdi mantang ini repleksyon kan sadiri niyang buhay asin nagseserbing pagpagamiaw dapit  sa personal niyang relasyon sa Amang 

Si Rommel Respeto, 31 años,  nagtatrabaho sa kumbento kan parroquia ni San Juan  Bautista sa Goa, an apat nang taon na natukahan kan  papel na Hesucristo. Segun sa saiya, an pagigin Hesucristo sarong agyat na mabuhay nin matanos mantang an kadaklan naglalaom na siya magin arog ki Hesucristo sa tunay na buhay.

Segun ki Respeto na sarong Cursillista asin miembro sa Knights of Columbus  an pagigin Hesucristo saro nang panata para sa saiya orug pa ta dakol ining naidulot na karahayan sa saiyang buhay espiritual.  

Inako  man niya na an eksenang  nagpapalumoy asin garong nagbibiring  kan saiyang puso hasta sa mapaluha siya  iyo an pagdulok ni Santa Maria ki Hesucristo mientras na pasan Niya an cruz. Sa paagi kaini, naroromdoman  niya an sadiring ina na danay an pagpadangat sa saiya.

Malinaw sa memoria ni Respeto an sinabi ni Hesucristo sa Saiyang ina: “O, Maria, ina Ko, pagmasdan mo Ako, iheras mo sa mga tawo an pakikisumaro mo sa pagsakit Ko.”

Mientrastanto, sinabi kan dating cura parroco kan Archdiocesan Shrine and Parish  of St. Joseph asin ngonian Obispo kan Diocese kan Virac, Louie Occiano na an kahalagahan kan mga actividad relihiyoso iyo ta  napapahiling  asin himate kaini sa mga kaakian asin hubenes an pagsakit,  pagkagadan asin pagkabuhay liwat ni Jesucristo.

Segun sa saiya ngonian na modernong panahon efectivo an visuals sa pagpaabot nin mga idea asin mensahe. Sa lado kan kamagurangan saro ining oportunidad na ipaliwanag sa hubenes an mga bagay spiritual na kulang sinda sa pagsabot.

Pigmamawot kan Obispo na lugod an live reenactment kan pagsakit, pagkagadan asin pagkabuhay liwat ni Hesucristo magserbing dagdag na catechesis sa buhay Cristiano kan mga katawohan.

Eksena sa live passion play sa Partido (Photo - Lets Go Partido)