Local entrepreneurs tampok sa ilaw-ilaw kan Pasko sa Partido

By Sonny Malate

Goa, Camarines Sur --- Nagin parte na kan taonan na celebrasyon kan Kapaskohan an pagkakaigua nin mga macolor na ilaw, higanteng Christmas tree, magagayon na parol sa mga plaza asin  atubangan kan edificio municipal sa sampolong  banwaan digdi sa Partido Area. 

Ngonian na taon, sa primera vez, especial na tampok iyo an paglatag nin mga panindang producto kan mga local na entrepreneur sa nagkakapirang banwaan digdi.

Sa banwaan kan Goa, sa Deciembre 15, kasabay kan pagliwanag kan ilaw-ilaw sa compound kan bagong government center sa Barangay Tagongtong, pagtindog kan higanteng Christmas tree asin cultural presentation iyo man an pagbukas kan Christmas Bazaar na paparticiparan kan 48 local na entrepreneurs asin negosyante. An sarong bulan na celebrasyon may temang “Paskong GOAeño,  Burogkos asin Mamomoton.”

Ini pinapamahalaan ni  Alkalde Marcel S. Pan asin nasa activong pagpadalagan ni Ms. Shiela Orlina Belleza, Municipal Tourism Officer asin iba pang empleados kan LGU.

Sa banwaan kan Lagonoy, apwera sa pagkakaiguang mga iba-ibang ilaw sa municipal building mismo asin plaza,  may mga stalls man na nakahilera sa pagirilid kan lugar na  kabale sa trade fair na pig-initiar kan DTI Negosyo Center. 

Ini sa initiativa ni Ms. Nica R. Clemeno, Business Counselor asin  suportado ni Alkalde JB Pilapil.

An mga puwesto bukas aldaw asin banggi kaya apwera sa pagdalan kan mga magagayon na dadalanon may mga mababakal man na productong gibo kan mga local na entrepreneur, saradit na negosyante asin cooperativa.

An mga kabarale sa Micro, Small and  Medium and  Enterprises (SMES) kan Lagonoy  nagparticipar man sa Feria de Camarines na pigpadrinohan kan Department of Trade and Industry (DTI) kan mga uminagin semana sa ciudad nin Naga.

Mientrastanto, sa coastal na banwaan kan Garchitorena, orgulyong pigpahayag ni Alkaldesa Leda S. San Luis na sa primerong vez nagkaigua nin magarbong ilaw asin mga adorno sa atubangan kan edificio municipal kan localidad.

Dinagdag pa niya na primerong nagkaigua nin night market sa coastal na banwaan na ini  na ikinaogmang maray  kan mga namamanwaan.

Kabale sa nagbukas nin puwesto sa night market iyo an 23 na women’s group kan banwaan.

Mga native products an mabenta sa night market. Siring man an mga higanteng anit asin lobsters hale sa mayaman na kadagatan kan Garchitorena.

An pagtampok kan mga panindang producto sa mga actividad sa Kapaskohan nagreresulta sa paglangkaw kan  ganada kan mga local na entrepreneur, pagrambong kan local na turismo asin dagdag color asin kaogmahan kan mga namamanwaan.