'LOYALTY CHECK' SA MGA SOLDADOS SINIKWAL: Leyaltad kan 9th ID sa konstitusyon

Sinikwal kan 9th Infantry ‘‘Spear’’ Division, Philippine Army (9th ID) sa Bicol an ‘‘loyalty check’’ sa mga soldados kaini mantang an leyaltad ninda sa konstitusyon, chain of command asin ano man na legal order kan saindang mga commanders.

Sa entrevista kan Bicol Mail ki Major Frank Roldan, opisyal na parataram kan 9th ID sa Camp Elias Angeles, Pili, Camarines Sur, ini an saindang panindugan sa tahaw kan isyu sa pagpa-arestar kan International Criminal Court (ICC) sa dating presidente Rodrigo Duterte huli sa casong crimes against humanity.

An dating presidente yaon na ngunian sa custodia kan ICC sa The Hague, Netherlands.

An AFP professional na organisasyon dai nakikiaram sa banggaan nin mga politico sa ano man na isyu envez an samuyang leyaltad yaon sa satong konstitusyon saka chain of command, sabi pa ni Maj. Roldan.

Dai palang nahahaloy, sinabi ni Maj. Gen .Noe Alberto Peñafiel, Commander kan 9th ID, ano man na sabihon na orden kan saindang mga commanders iyo lang an dapat sunodon asin kun makikisawsaw sa kariribokan sa politica, ‘‘kawawa ang bansa, kawawa yung mga anak natin, kawawa yung mga apo natin’’.

An saindang soldados iguang pigsusunod mientras na yaon sa serbisyo asin kun iba na an panindugan dapat magdemiter sa serbisyo militar. Bawal sa sainda na mag-post asin ano man nagluluwas sa social media mantang trabajo an saindang inaatendiran komo military.

Sa ngunian prayoridad kan 9th ID na taposon an problema sa insurhencia digdi sa Bicol. Ginatos nang mga lider asin miembros kan rebeldeng New People’s Army an nagsuruko sa gobierno. An saindang misyon matapos an insurhencia para sa matuninong na paz y orden sa rehiyon.

Mga soldados kan 9th ID kan Philippine Army sa Bicol nag-aandam kan saindang mga actividades sa ika-128 anibersaryo. Kabale sa programa an pagkaigua nin concierto kan mga soldados na gigibohon sa SM Mall sa Marso 22, 2025. (9th ID)