Madam Leni for Congresswoman!

Kun an eleksyon guiguibohon ngonyan na taon imbis na norong taon 2025, gana na si Ernesto “Nonoy” VILLAFUERTE Magtuto Jr, an paboritong pinsan ni Congressman LRay Villafuerte ta mayo pa man na naglalantad na tunay na kalaban sa tercer distrito kan Camarines Sur ngonyan na mga ngonyan.

Pero kun si Mayor Nelson Legacion an maguiguin kalaban ni Sir Nonoy pareho taguilid an challenger na gustong magribay ki Congressman Gabby Bordado an incumbent Mayor na si Nelson Legacion na maski may kuarta na pero mayo siyang dakulang pangaran asin an saiyang paragastos mayong laban sa paragastos nin sarong Villafuerte.

Ano baya talaga an dadalagan ni dating VP, dating congresswoman asin dating First Lady kan Naga na si Leonor Santo Tomas Gerona Robredo?

Poon pa kan 2022 kan maggana si Bongbong Marcos para Presidente iyo na yan an hapot kan mga Bicolano bako lang digdi, sa ibang parte kan Pilipinas o sa ibang parte kan kinaban: Ano an masunod na dadalagan ni Leni?

Kun ako an hahapoton si Leni dapat magdalagan guiraray para congressman karibay kan saiyang padangat na si Congressman Gabby H. Bordado Jr?

Nagtukaw na siya bilang deputado sa Naga asin tercer distrito asin marahay an saiyang naguinibohan mala ta napa-riprap niya an kalabaan kan Naga City River asin pinili siya ni dating Presidente Noynoy Aquino asin dating DILG Secretary Mar Roxas na maglaban para Vice-Presidente asin naggana, mala ta dinaog an aki kadtong Presidente Ferdinand Edralin Marcos Sr asin Primera Dama Imelda Romualdez Marcos asin Gobernadora kan Metro Manila ngonyan Presidente Bongbong Marcos.

An kadaklan kan mga siguidores ni Leni nagtutubod na bako lang siyang dinaya kan kampo ni Bongbong kundi binutasan talaga siya kan Estados Unidos kaya nagrampaog. Si Bongbong an tinangkuros kan America kaya nangganang dakulaon an baya.

An kadaklan kan mga loyalista ni Madam Leni gusto pang magprotesta alagad sa Pilipinas mayong minagana na protesta laban sa incumbent President. Pwedeng kudeta o pag-aalsa kan fuersa militar laban sa cumander-in-chief. Pero dae na kita mangaturogan kaiyan. Peace lang kaya dapat ipadagos an eleksyon norong taon asin an Presidential election sa 2028.

Kun ako an hahapoton ta saro na man lang na taon an natada ki incumbent Mayor Nelson Legacion dapat tugutan na siyang magre-election tanganing dae na magka-baranga an City Hall ngonyan, dae na masanglian an mga casual employees kesera sarong taon asin sabi ngani kaiyan ni Mayor Legacion mismo dae niya mababasol an mga Villafuerte kun bilib man kan saiyang padalagan kan City Hall--- Gulping proyekto, may disiplina sa tinampo, magayon an trapiko sa mga kalye kan ciudad, kontrolado an droga asin mantinido an paz Y orden. Jueteng lang an problema.

Ano man ta mapahonod siya ki Madam Leni? Pigserbihan niya man nin halawig na panahon asin ikinampanya niya pa kan mga naka-aguing eleksyon?

Kun sabagay maski anong dalaganan ni Leni norong taon--- mayor, congresswoman magana pa. Bako nang senadora ta magastos yan mayong dakulang kuarta si Madam.

Ta si Leni gulpi pang tagahanga maguin sa Naga, sa Camarines Sur o sa bilog na nasyon. Garo magana si Leni kun para alkalde, garo magana si Leni para congresswoman, lingawan ta na muna an posisyon para senadora itao ta na yan ki Laila de Lima na igwa man national following.

Kaya lang an problema ta kun mag-mayora kan ciudad si Madama Leni, lalong makusog an puersa ni Nonoy V. Magtuto ta suportado siya kan Capitolyo asin ta kun ini maggana (bakong arog duman sa Partido) makokompleto na an kontrol kan mga Villafuerte sa provincia nin Camarines Sur.

Kun iisipon kan 1993 kan maglaban si Mrs. Pura Luisa Villafuerte Magtuto kontra ki Jesse M. Robredo na kinampanya kadtong gurang na LRV kontra ki JMR na saiyang sobreno asin aijado sa kasal, bako lang dinaog si saiyang tugang na matua ta sa eleksyon na idto namundag an Ubos kun Ubos, Gabos kun Gabos political phenomenon sa Naga. The rest is history.

Binalewala pati kadtong gurang na Villafuerte si saindang Robredo Villafuerte family tree.

Tibaad an tuyo niya kaidto makua an suporta kan pamilya Roco preparasyon sa pigpa-planong dinastiya kan mga Villafuerte sa politika ngapit.

Kaya kun ako an hahapoton mas gusto kong Leni an magsabat ki Nonoy sa sarong turoltulan na saraplakan sa politika digdi sa Bicolandia.