Maghapot kita ki Father

Dear Father Bill,

Ano daw kabotan nin Dios an mga bagyo, baha, linog, landslide asin iba pang calamidad?

An minagalang, Riza Mae

Dear Riza Mae,

Sa katunayan, bako an Dios an causa kan bagyo, baha, linog o anoman na karatan. Tinotogotan nya sana an natural na dalagan kan kinaban. Siring man baga kan talingkas na kabotan (free will) nin mga tawo. Kun pilion nin tawo an maraot kaysa karahayan, dai Niya pinopogolan an tawo. Sabi sa Roma 8:28, an Dios pirming naggigibo nin mga bagay para sa satong karahayan o hinihimo niyang magin maray an satong kamugtakan asin baliktadon an madatang sitwasyon na magin sarong bendisyon.

Mayong papel an Dios sa mga calamidad na minaagi sato, arog kan si bagyong Kristine. An mga bagyo, baha o linog nangyayari asin an mga tawo ginigibo an mga praktikal na paagi para atubangon sinda. Minsan an biblia dai pighihiling an mga calamidad na parte kan pagkastigo o paghuhukom nin Dios sa tawo. Alagad sinasaysay sa biblia an mga bagyo sa buhay: mga bagyo na dinadara ta sa satong sadiri (arog ni Samson) asin  mga bagyong hale sa ibang tawo (arog kan ki Pablo asin Silas na piglaog sa preso).

Pwedeng itogot nin Dios an mga natural na calamidad na mangyari huli ta, sa saiyang mayong sukol na kadonongan, aram Niya pwede kaining mahaman an saiyang katuyuhan na madara an mga kalag sa buhay na daing kasagkoran. Hale sa karatan, kaya nin Mahal na Dios magdara nin karahayan. Aram ta na sa gabos na bagay hinihimo nin Dios an karahayan para sa gabos na namomoot Saiya.

Bilang pagtapos, dai ta nanggad basolon an Dios sa anoman na maraot na nangyayari sa satong buhay ta bako man ining hale Saiya ‐- bagyo, baha, pagtios, helang o kagadanan. Gabos sanang mga marahay na bagay an hali saiya. Kun siring, siya an satong kasurog sa gabos na oras. Sabihon ta saiya an satong mga kadificilan.

An minagalang, Fr. Bill

* * *

Email me at: billparisadmu@gmail.com