Maghapot kita ki Father

Dear Father Bill,

Tano po ta kaipuhan mag retreat o santo ejercicios an mga padi sa laog nin sarong Semana?

An minagalang, Jay

Dear Jay,

Enot sa gabos, sinasabi sa Canon Law o an ley na sinusunod kan Simbahan na kaipuhan mag-retreat an mga padi kada taon para sa saindang personal na kabanalan. An retreat sarong panahon na an sarong tawo tinatawan nin atensyon asin paghorop-horop an estado kan saiyang relasyon sa Dios asin sa kapwa. An retreat pwedeng gibohon sarong semana, sampolong aldaw o sarong bulan, depende sa gusto kan tawo.

Ikaduwa, sa retreat mas magayon mag-isip-isip kan personal na buhay. Mahiling an mga dapat ontokon huli ta dai nakakatabang sa pagtalubo kan pagkatawo. Poonan an mga dapat poonan para maglakaw sa dalan nin kabanalan, asin ipadagos an mga bagay na mga maray asin ikinakaogma nin Dios. Makahaman nin mga paagi o stratehiya kun páno ipapadagos an buhay pakatapos kan retreat.

Ikatolo, sa retreat nagkakaigwa nin pag-ontok sa kadakul na gibo aroaldaw para tanawon giraray an mga bagay-bagay, makapag-plano kun páno pa mas orog mapapakarhay an paglingkod sa Dios asin sa tawo. Kadakul an nawawarang oras asin oportunidad kun padagos-dagos sana an buhay na kun minsan sala na an direksyon.

Ikaapat, an retreat nagtatao nin bagong paghiling kan mga bagay sa buhay nin sarong tawo. Kun dai nagtatalubo an pag-apreciar kan mga bagay, masakit man magin mahiwas an pakasabot asin pagdara kan lambang hamon o problema na minaabot. Maghorop-horop, magpamibi, magplano, mag-ako kan mga kaluyahan, maghagad tawad, asin magkaigwa nin kusog boot na atubangon an mga dapat pakarayon -- ini an nagkapira sana sa mga pwedeng gibohon sa retreat.

An minagalang, Fr. Bill

* * *

Email me at: billparisadmu@gmail.com