Maghapot kita ki Father

Dear Father Bill,

Ano po an mga Camareros na pirmi ming nadadangog pag-abot kan Semana Santa?

Minagalang, Leticia

Dear Leticia,

An camarero pwedeng may tolong kahulugan arog baga kan waiter, server, o steward. An ikatolo (steward) an pinakaharaning kahulugan kan camarero pag-abot kan Semana Santa. An camareros iyo an mga tawo o familia na nag-aataman sa mga Santo na pigpu-prusisyon kun Semana Santa. Sa bilog na taon yaon sa saindang pangangataman an mga Santo asin ini an nagigin punto nin pagkasararo kan familia asin magayon na dalan nin kabanalan kan lambang saro.

Kun Semana Santa, an ibang mga miembro kan familia minapuruli hale sa manlaen-laen na lugar, tanganing makisumaro sa pag-samno asin pag-andam kan saindang Santo na ipu-prisisyon. Dakulang biyaya sa familia huli ta sinda igwa nin oportunidad na magkairibahan, magkasararo asin magpamibi.

An camareros dapat nindang isipon na tinawan sindang privilegio kan Simbahan na mag-ataman asin ma-iba sa solemneng mga pag-prusisyon. Huli ta ini gawe nin pag-penitencia, dai kaipuhan magpagarayonan nin sulot an mga Santong ataman ninda o maglaag nin dekorasyon na nakakakua na nin sobrang atensyon asin nalilingawan na si tunay na katuyuhan kan actividad. Simpleng bado kan Santo asin tama sanang dekorasyon kan carro na linulunadan kaini an magdadara sa mga tawo na nagpu-prusisyon sa mga nin pamibi asin paghorop-horop.

Siring man, kaipuhan may pagtugot an otoridad kan parokya kun ika o an saindong familia boot magin camarero. Dai tugot na basta-basta ka na lang mapagibo nin Santo, dangan mabali ka sa mga prusisyon na ginigibo kan parokya. An paglinya kan mga Santo sa prusisyon igwang istoryang sinusunod na hale sa biblia. Bakong magayon kun doro-doroble an mga Santo na garo mayo nin kaayusan.

Orgulyo asin privilegio kan mga camareros (kan sarong tawo o sarong familia) an pag-ataman sa mga Santo. Kun siring obligasyon man kan mga camareros an pag-agko kan gasto sa pag-preparar asin pag-iba kan mga ini sa prusisyon. Ini nagpapahiling kan saindang dayupot asin pusog na devocion sa Santong saindang inaataman.

An minagalang, Fr. Bill

* * *

Email me at: billparisadmu@gmail.com