Maghapot kita ki Father

Dear Father Bill,

Totoo daw po an tentacion kan demonyo? Ano an ginigibo kaini sa buhay ta?

Minagalang, Lolit

Dear Lolit,

An tentacion hale sa demonio, sa kinaban, asin sa mga maraot na kamawotan o hilig nin tawo. Sabi ni Blaise Paschal, sarong Christian Philosopher: “Ginagamit ta an halawig na parte kan buhay ta sa mga bagay na nalilihis an satong pag-isip sa mga bagay na totoong mahalaga sa buhay.” An panahon nin Cuaresma sarong oportunidad na halion ta an bakong mga importanteng bagay sa sato.

Kun minsan, natetentaran kang magpalusot o maghambog, maggibo nin maraot sa sarong tawo na dai ka man inaano. Magkua nin mga bagay na bako mo, huli ta nauuri ka. Raoton an sarong tawo na nag-aasenso. Mag-isip nin mga sekwal na bagay. Dai gibohon an mga responsabilidad. Ini gabos nagkapira sana sa ginatos na tentacion na pwedeng mag-abot saimo aroaldaw, orog na kun mayo kang ginigibo.

An tentacion bakong hali sa Dios, alagad pwedeng itogot nya ini para probaran an satong pagkadayupot Saiya asin magin oportunidad na magtalubo kita sa kabanalan. An mga tentacion pwedeng sa mga kamawotan o mga inclinasyon (internal) o pwede man sa kapalibotan, sitwasyon, o mga tawo (external). Sa mga tentacion, kun linalabanan ta, pwede kitang magtalubo sa mga maray na gawe or magkaigwa nin maray na pakamidbid o kontrol sa sadiri (self-mastery).

Sabi ni Fulton Sheen: “Natetentaran kita bako dahil kita maraot, kundi kita mga tawo.” Sabi ni John Piper: “An tentacion nagkukua kan saiyang kapangyarihan sa pagpapatubod sato na kita mas magigin maogma kun dai ta labanan ini.

An tentacion bako pa man kasálan. Pero dinadara kita kaini sa kasalan. Halimbawa, nakakamate kan nin pagkasuya, naiinggit ka, may maraot kang kaisipan asin iba pa. Bako pa man ining kasalan ta mayo ka pa man ginigibong maraot dahil sa mga pagmate mo. Pero kun minuda mo na o rinaot mo na an sarong tawo dahil sa kaanggotan mo, duman ka na nagkasala.

Sagkod na nabubuhay kita asin aktibo an satong isip, dai mawawara an tentacion. Ika na sana an ma-desisyon kun aakoon mo an tentacion o lalabanan mo ini. Dai kita magbutas ki Jesus para pirmi kitang may kusog laban sa maraot na kaisipan, gibo, o pagmate.

An minagalang, Fr. Bill

* * *

Email me at: billparisadmu@gmail.com