Maghapot kita ki Father

Dear Father Bill,

Ano an kahulugan kan kada aldaw kan Semana Santa. Ano an konekyon kaini sa lambang saro?

Minagalang, Elysa Rose

Dear Elysa Rose,

Sosog sa evangelio, ini an mga nangingibabaw na mga pangyayari sa lambang aldaw kan Semana Santa. Sa Domingo de Ramos si Jesus ma-triunfanteng naglaog sa Jerusalem sa tahaw kan mga tawo na nagkukurahaw nin “Hosanna.”

An Lunes Santo iyo an pagbisita ni Jesus sa saiyang mga katood sa Betania asin si Maria linahidan nin mahamot na oleo an bitis ni Jesus.

An Martes Santo iyo an paghula ni. Jesus kan pagpapasaluid ni Judas asin an pagnegar ni Pedro ki Jesus nin tolong beses.

An Miercoles Santo iyo an pagkikipag-transakyon ni Judas sa mga kapadian (high priests). Ipinabakal nya si Jesus ni 30 pidasong plata (silver).

An Jueves Santo iyo an pagkakaigwa kan Huring Pamanggi ni Jesus. Tinogdas man ni Jesus an mga sacramento nin Eucaristia asin Pagpadi.

An Viernes Santo iyo an pag-sentencia ki Jesus nin kagadanan. Siya ipinako sa cruz, dangan nautsan. Siya ilinobong.

An Sabado de Gloria iyo an pagbaba ni Jesus sa dai masokol na kairaroman.

An Domingo nin Pagkabuhay iyo an pagbangon ni Jesus sa mga gadan.

An minagalang, Fr. Bill

* * *

Email me at: billparisadmu@gmail.com