Maghapot kita ki Father

Dear Father,

Arin po an mas mabisang bendisyon: an bendisyon kan padi o bendisyon kan obispo o Santo Papa?

An minagalang, Joseph

Dear Joseph,

Sosog sa Canon Law 1169, an consagracion asin dedicacion ginigibo kan mga pig-ordenan na obispo asin kan mga padi na tinutugotan kan ley o lehitimong tinawan nin poder. An siisay man na padi pwede magtao nin bendisyon, afuera na lang sa mga nakareserba para sa Santo Papa o mga Obispo.  An diacono pwede man magtao nin bendisyon sosog sa ipinagboboot kan ley.

Igwang mga bendisyon man na pwedeng gibohon kan gabos -  obispo, padi, diacono. An bendisyon bakong sacramento kundi sacramental. Mina-epekto an bendisyon depende sa disposisyon kan nag-aako kaini.

Sa mga sacramental, an mga pagbendisyon iyo an mahalaga. Sa decreto kan pag-publicar kan Book of Blessings, sinabi ni Cardinal Mayer, prefect of the Congregation for Divine Worship, na “An celebracion kan pagbendisyon igwa nin privilegiong lugar sa mga sacramental na minukna kan Simbahan para sa benepisyo pastoral kan banwaan nin Dios.  Bilang gawe sa liturgia, dinadara kan celebracion an mga tawo sa pag-omaw sa Dios asin inaandam sinda para sa prinsipal na epekto kan mga sacramento.

Sa pag-celebrar kan bendisyon, pwedeng pakabanalon kan mga tawo an manlaen-laen na sitwasyon o actividad kan saindang buhay. An mga bendisyon mga tanda sa mga tawo kan espiritwal na benepisyong natipon huli sa intersesyon kan Simbahan. Kun maray an disposisyon kan maako nin bendisyon, makukua niya an spiritwal na benepisyong saiyang pinag-aarang -- dai na importante kun obispo, padi o diacono an nagtatao kaini.

An minagalang, Fr. Bill

* * *

Email me at: billparisadmu@gmail.com