Maghapot kita ki Father

Dear Father,

Nuarin po dapat bonyagan an sarong omboy? Kadaklan na beses po kaya an mga magurang naghahalat mag sarong taon an aki para makatipid sa gastos sa bonyag asin primerong kompleaño kan aki.

An minagalang, Roxanne

Dear Roxanne,

Kadaklan na beses, binobonyagan an aki sa pinakaamay na panahon. Kun andam an magurang pwede ngani pakalihis nin ikawalong aldaw pakamundag nya. An mga omboy kaipuhan tukduan asin padakulaon sa tamang pagtubod poon sa mga enot na aldaw kan saiyang buhay, tanganing ini nakagamot sa saindang pagkatawo, isip asin mga gibo.

Mas magayon kun an mga aki mabobonyagan sa mga enot na semana pakatapos mamundag. Sosog sa Canon Law 867, an opisyal na “ rulebook” kan Simbahan, “An mga magurang obligadong masiguro na an saindang mga omboy mabonyagan sa mga enot na semana pakatapos nindang ipangaki.

An ano man na edad poon sa pagkapangaki kan omboy kaipuhan mabonyagan tolos ini huli ta an gabos nangangaipo kan gracia nin Dios. An aki binobonyagan sa tubig asin sa Espiritu asin nagkakaigwa nin bagong buhay ki Cristo. An mabooton na pagkamoot nin Dios iyo an ginigikanan nin kaligtasan. An Espiritu nin Dios an minahali kan kasalan na orihinal na minana ta ki Adan asin ki Eva.

Dakul man na familia pinipili na pabonyagan an saindang mga aki pakalihis nin duwa o tolong bulan pakapangaki. Basta kun ano man an aldaw o bulan na pinili kan mga magurang kan omboy, an sinasabi kaipuhan  bonyagan tolos sa lalong madaling panahon.

An minagalang, Fr. Bill

* * *

Email me at: billparisadmu@gmail.com