Maghapot kita ki Father

Dear Father,

Nuarin po dapat magpa kumpil? Kaipuhan na halaton an panahon na pagpapakasal para magpa kumpil?

An minagalang, Stephanie

Dear Stephanie,

An 1983 Code of Canon Law kan Simbahan, na pinadagos an reglamento sa Kumpil  kan 1917 Code, nagsasabi na pwede nang mag-ako kan sacramento nin Kumpil an sarong Catolicong Cristiano na yaon na sa edad na 7 años hanggang 18 años, fuera na sana kun an sarong episcopal conference arog kan Catholic Bishops Conference of the Philippines (CBCP) igwang itinalaan na edad sa pwede nang mag-ako kaini.

Sa Pilipinas,  an edad sa pag-ako kan sacramento nin Kumpil dapat dai magbaba sa siete años (7), o pakatapos mag-ako nin primera comunion, fuera na lang kun sa paghiling kan ministro, huli sa magabat na rason, dai pa an sarong aki pwede mag-ako nin Kumpil. An kada parokya igwa nin sadiring registro kan Kumpil base sa Canon Law (no. 535 & 895). Digdi sa Archidiocesis kan Caceres, an pwedeng mag-ako kan Kumpil minapoon sa edad na doce años (12) o yaon sa Grade Six. An ibang diocesis  nagtutubod na an aki dapat munang makumpil bago mag-ako kan primera comunion; kun siring aki pa sindang kinukumpil.

Dai na dapat halaton na kun suarin ikakasal na, saka pa sana mapa-kumpil. Garo baga gagamiton sana an kumpil tanganing makumpleto an mga kaipuhan na dokumento sa pagpakasal. Kaipuhan makumpil na dawa dai pa ikakasal para maako kan sarong binonyagan an kapanoan kan biyaya kan Espiritu Santo na kaipuhan habang nagtatalubo an sarong tawo.

An minagalang, Fr. Bill

* * *

Email me at: billparisadmu@gmail.com