MAHAL NA PRESYO NIN BAGAS: Saro sa causa sa halangkaw na inflation sa Bicol, sabi

An presyo nin bagas na pinangako ni Presidente Ferdinand Marcos Jr. ibababa sa P20.00 cada kilo alagad saro sa mga mayor na produkto sa mercado na mahal an presyo na dahilan kan paglangkaw kan inflation sa Bicol kan Marso 2024.

Sa pinaluwas na report sa miembros kan media kan Philippine Statistic Authority (PSA) sa Bicol sa pamamayo ni Regional Director Cynthia Perdiz, nagsakat sa 3.7 por ciento an inflation rate sa rehiyon kan Marso, mas halangkaw kumpara sa 2.9 por ciento kan Febrero an average inflation sa enot na cuarto ngunian na taon.

Afuera sa halangkaw na presyo kan bagas an iba pang produkto iyo an karneng manok, mga pagkakan na kaipuhan aroaldaw, mga presyo nin gulayon na haloy magbaba an mga presyo asin non-alcoholic beverages.

Dawa naglangkaw an inflation rate, alagad sinabi kan PSA Bicol na mas hababa ini kumpara sa 7.1 por ciento na naikurit sa kaparejong bulan kan nakaaging taon 2023.

Sa mga provincia kan Kabikolan an Catanduanes iyo an may halangkaw na inflation sa rehiyon na nagsakat sa 4.9 por ciento mientras na sa Sorsogon igua sanang 1.6 por ciento, sabi pa kan PSA.