ManangRIBO, ManingKWENTA

Tigsik ko an panahon kan karampanyahan

An bobotante mapupula an hasang

Pagbakal nin boto pasiremplehan

Babawion sa kaban kan banwaan!

Tigsik ko an bobotanteng estupido

Ogma sa pahalnas kan polpolitico

Sa dikit na pirak saiyang nasalo

Pigbenta an futuro sa demonyo!

Tigsik ko an magkalaban na candidato

Nagwawaan kan raot sa publico

An dae aram kan duwang campo

An saindang lusbot maitom pareho!

Tigsik ko an pag-entra sa politica

An laban bakong isyu, personalan na

Kinakalkal an raot kan bilog na pamilya

Sa grabeng bangog ika masuruka!

Tigsik ko an kawat sa politica

Kun an benino kan kwarta maghiro na

Minaontok an alimpasay saka platica

Minatuninong, dagos nang minakalma!

Tigsik ko si ManangRIBO, si ManingKWENTA

Sige an pasadpasad pagkampanya

Dae magrasoraso, maghalat ka sana

Dae mahaloy sa bunganga mo nakatapal na!