Mayong Delikadesa o Sobrang Ambisyon

Iba-iba an nagin reaksyon ko kan nabasa ko an news online na segun ki Bise Presidente Sara Duterte, makandidato sa pagka senador sa 2025 si dating presidente Digong Duterte asin an duwa nyang aki na si Pulong saka si Baste.

An enot kong reaksyon, wow, talagang daing supog; mayo man lang delikadesa an mag-arama. Talagang dai mapahunod an mga Duterte na mawaran nin posisyon o poder sa gobyerno. Aram man kan kagabsan na an mga Duterte sarong political dynasty sa Davao. Sain ka nakahiling na pamilya na an gabos na mga aki may posisyon sa gobyerno: si Baste mayor kan Davao City; si Pulong, sarong kongresista; si Sara, bise presidente. An ama dating presidente kan nasyon.

An mga Duterte garo man an mga Villafuerte sa Camarines Sur na pigpapasa sana sa mga aki an mga posisyon sa gobyerno. Bakong sa habo nang butasan an posisyon ninda sa gobyerno, kundi gusto pa nganing kontrolon, kun pwede lang, an gabos na congressional districts sa probinsya. Siyempre pag nasa posisyon madaling mag magic nin kwarta. Aram yan kan mga Villafuerte. Dai na kita magpralastikan.

Perang dekada nang kontrolado kan mga Villafuerte an Camarines Sur pero dai baga nag-aasenso. An probinsya iyo an pinaka pobre sa anom na probinsya kan Bikol Region na may 38.7% na poverty incidence.

Balik kita sa mga Duterte. Dai ko ma-imagine kun ano an mangyayari sa Senado kun manggana an tolong “Duterte boys.” Bako nang an mga tawo an may kontrol sa Senado kundi nagkakaperang pamilya na lang. Herak man kan mga Pilipino. Herak man kan Pilipinas.

Sa presenteng Senado ngunian nagkakapera na an mga senador na hale sa political dynasty. Yaon si Imee Marcos, si Bong Revilla. Yaon an mga Cayetano, mga Villar, mga Estrada, tapos madadagdagan pa kan mga Duterte.

Sasabihon kan mga supporters na Duterte na maski siisay na Pilipino basta kwalipikado pwedeng magkandidato. Totoo yan. Pero para sakuya an mas importanteng dapat maaraman kan mga tawo ano an rason ta gustong magin senador kaining mag-arama.

Si Digong bako lang sa gurang na kundi mayo man marhay na plano para sa Pilipinas. Mala ta si saiyang adbokasiya laban sa droga, mayo man bagang nangyari. Sobra sa 30,000 na Pilipino an ginaradan kan mga pulis dara kan saiyang madugong “Operation Tokhang” pero dai man naresolbaran an problema sa droga. An mainit na problema kan Pilipinas saka kan Tsina, isasali ko na an POGO, resulta kan mga salang polisiya ni Digong. An pag-acquit ki Leila de Lima nagpapa-totoo na ginibuhan lang kaso si de Lima ni Digong, gamit an gabos na pwersa kan gobyerno pati an Kongreso saka Senado.

Si Baste garo man si Digong pag-abot sa kun ano an dapat gibuhon sa mga may problema sa droga. Mala ta perang aldaw lang matapos ideklara nya sa Davao City an kampanya laban sa droga, pitong Davaowenyo tulos an binaradil kan mga pulis.

Pag-abot sa kun pano dapat reresolbaran an problema sa West Philippine Sea, an posisyon kan mga Duterte, pati na ni Sara, kontra sa posisyon kan gobyerno na ipinaglalaban an sobereniya kan nasyon. Risang marhay an pagka Tsina ninda. Suportado pa ngani ninda si Pastor Quiboloy na wanted kan gobyerno dara kan saiyang mga kaso arog kan human trafficking, rape, money laundering, etc. Tapos ngunian gusto kan tolong “Duterte boys” na magin senador. Wow, talagang mayong supog. Anas personal na interes an nasa isip kan mga Duterte.

An paghiling ko sa mga Duterte aram nindang nawawaran na sindang impluensya kaya gusto nindang ipahiling na yaon pa an saindang kusog sa politika. Dakulang risk an gigibuhon ninda ta kung madaog sindang tolo sa pagka senador sa 2025, tapos na an pamilya ninda politically. Pati sa Sara madadamay na basang-basa na ngani an papel sa mata kan publiko.

Gulping pwedeng ikaso sa mga Duterte lalo na ki Digong sa maabot na mga aldaw. May mga nagsasabing siguradong kakasohan si Digong kan International Criminal Court (ICC) dara kan saiyang madugong kampanya laban sa droga. Maski si Sara baka makasohan man kan ICC. An dating senadora na si Leila de Lima nagdeklara na na pig-aadalan kan saiyang mga abogado kun kakasohan nya si Digong. May mga nagsasabing baka si Baste masuspendi man.

Kaya desperado na an mga Duterte. Naghihingalo na sinda politically. Pag uminabot an aldaw na kakasohan na ni de Lima si Digong o kakasohan na si Digong o si Sara kan ICC, dakulang bagay lalo na sa Pilipinas, kun an tolong “Duterte boys” naka posisyon sa gobyerno bilang mga senador. Tapos bise presidente pa si Sara.

Apat na taon pa bago mag eleksyon nin bagong presidente. Pero nahihiling ko sa bolang kristal ko na may sarong Duterte na madalagan sa pagka presidente sa 2028 ta nasa interes ninda an pagiging political dynasty, maski kontra ini sa espirito kan Konstitusyon. Kun bakong si Sara, si Baste an madalagan na iyo an gusto kan saindang ina.

An hapot: Mayong delikadesa an mga Duterte o sobra an ambisyon?