Mayor Nelson Legacion para re-election

Sa decente asin toro-toltol na politika asin sa ibang parte kan politika, an incumbent o nakatukaw sa puesto iyo na an pinapaonrahan na magkandidato guiraray asin haros mayo nin makusog na kalaban bilang premyo kan saiyang naguinibuhan.

Si Mayor Nelson Legacion na nagpara-konsehal, nag-Bise-Alkalse asin duwang beses nang na-ilihir bilang alkalde kan ciudad nin Naga dapat magpadagos sa ultimong tolong taon bilang Mayor kan Naga.

Daeng guirirong-ngirong sa laog kan City Hall maski an mga konsehales sa Sangguniang Panglungsod asin an mayoriya kan Kapitanes de Barangay.

An mga naka-ulay ko poon ki Mayor mismo asin ki Vice-Mayor Nene de Asis dae nagkokomentaryo sa bareta na si dating Vice-President Leni Robredo iyo na an makandidatong alkalde imbes na si Mayor Legacion.

Kun bakong no-comment, an simbang ninda sa hapot an sabi kan iba “inda man kaiyan”.

Bantog bareta na si VP Leni an malaban para Mayor.

Arog kan Sangguniang Panlalawigan kan CamSur, an mga miyembros kan Sangguniang Panglungsod dae man nag-guiguirirong. Pero sa laog kan isip ninda dapat magpadagos si Mayor Legacion nin saro pang turno antes magbaba sa puesto susog sa pinagboboot kan ley.

Sabi kan naka-ulay ko dae man lamang daa sinda pigkonsulta ni Mayor Legacion na makandidato siyang Congressman o ni Vp Leni kun siya an malaban para alkaldesa.

Sabi ninda dae matawadan an performance o accomplishments ni Mayor Legacion sa Naga maski hali siyang Rinconada asin an saiyang esposa taga- Camarines Norte.

Malinigon an palibot kan 27ng barangay kan Naga, mabugtak nin fountain sa Plaza Quezon, may bagong ospital na pig-aapod Naga City General Hospital, may mga bagong eskwelahan sagkod sa mga halangkaw na barangay kan Naga asin labi nang 200mil an populacion kan Naga na kun mag-abot 250mil pwede nang magsadering distrito na ipinag-rerepresentar nin sarong deputado.

An negosyo abunda, segi pa an tugdok nin mga malls pati sa parteng luwas kan centro kan Naga asin kadakul nang bagong tinampo para sa kadakul nang auto na nagdadaralagan sa maghapon asin magdamlag.

Mayo iriwal sa laog kan City Hall kontrolado an supplay nin droga o illegal na bulong, bararato an presyo kan mga barakalon sa saud, ogma an mga negosyante kaya mayo nang hahanapon pa.

Kun si JMR nakatapos kan saiyang turno duwang beses pa, si Bongat nakatapos nin siyam na taon, si Legacion dapat tapuson na an saiyang siyam na taon. Tolo naman sana an natatada saiya.

Kun igwang dinastiya sa Camarines Sur dapat mayo sa Naga ta ini pig-aapod na Most Competitive asin Centro of Good Governance o Centro nin Marhay na Pag-gogoberno. Si VP Leni dating Firstlady, dating Congresswomen na sinanglian ni Congressman Gabby Bordado dapat magbalik sa Congreso nganing magdalagan guiraray para presidente kan nasyon.

Kun si Leni magkandidato liwat para presidente kan nasyon sabi kan mga pink-lawan sa Manila asin ibang parte kan nasyon, si Senadora Risa Honteveros iyo an ma-Vice-Presidente, mapahunod ngani si dating Senadora Laila de Lima.

Ariglahon na an lign-up sa Naga asin Camarines Sur, Legacion for Mayor, Robredo for Congressman asin si Congressman Bordado puede pang marhay kun ano an saiyang gugustuhon.