Mga empleyados kan LGU pigpapangaladan mangampanya

Ni Paulo DS. Papa

GABOS na yaon sa elected positions kan gobyerno puedeng mangampanya para sa saindang mawot na mga kandidato.

Ini an malinaw na pahayag ni Atty Noriel Badiola, pamayo kan Comelec - Camarines Sur manungod sa mga empleyados kan gobyerno, na dae man pig-agi sa eleksyon an trabaho, dawa co-terminus an posisyon, kun man nanggad bawal mangampanya para sa mga nasunuan na kandidatos.

Si dating konsehal ngonian City Administrator kan Naga Joselito Del Rosario nagpahayag na pigtutugutan kan ley an saiyang paghayag nin suporta sa si isay man na kandidato komo co-terminus official.

Matatandaan na si Del Rosario, appointed na bagong administrador kan syudad pakalihis na maghale sa puesto ni Elmer Baldemoro tanganing magdalagan para sa kargong konsehal sa lindong kan Bagong Team Naga ni dating VP Leni Robredo.

Si Del Rosario sarong co-terminus official, mahale sa saiyang pigtutukawan na puesto oras na maghale na man si Alkalde Nelson Legacion, kandidato para sa kargong kongresista kan tercer distrito kan Camarines Sur.

Segun pa ki Del Rosario, pigpapangaladan an gabos na empleyado kan city hall na mangampanya, laen sa mga personal assistants orog na kan mga incumbent elected officials, na mag-iba sa pangangampanya.

An mga nakatukaw nang dati komo konsehal, ngonian nagdadalagan guiraray para sa parehong posisyon sa lindong kan Bagong Team Naga iyo sinda Konsehales Jose Perez, Omar Buenafe, Gayle Gomez, Jesse Albeus asin si Oying Rosales.

Mayo na man ibang kandidato ngonian na incumbent councilors kan syudad alagad an saindang mga kakontraryo sa politika rayaon na sa ibang linyada mantang an iba mga incumbent barangay officials iyo sinda Punong Barangay Jackie Villafuerte kan Peñafrancia; Ferdinand De Hitta kan Balatas asin si Ronald Lontok kan Liboton, gabos sa syudad nin Naga - sa lindong kan negosyanteng si Nonoy Magtuto, kalaban ni Legacion sa congressional poll.

Segun ki Badiola, pigpapangaladan na mangampanya an mga government employees alagad pigtutugutan na magpahayag kan saindang suporta sa kun ki isay man na kandidato susug na man sa konstitusyon asin mga reglas kan Civil Service Commission.

Mientrastanto kaipuhan na magsumetir nin petisyon an mga kandidato sa Comelec tanganing matugutan nang manao nin mga tshirt durante kan campaign period sa lokalidad.

Alagad piglinaw ni Badiola, na apwera sa petisyon kaiba dapat an sample kan mga ipapanaong item durante kan karampanyahan na may sadit na kantidad para sa assessment kan Comelec.

Pigsabi pa ni Badiola durante kan sarong press conference sa Mariners Polytechnic Colleges Foundation sa Canaman campus na susug man sa opisina sentral kan Comelec na dae man gayud maaapektaran kan tshirt an boto kan mga botante orog na kun sadit sana man an kantidad.

Dugang pa ni Badiola, oras na magkaigwa nin pinal na resolusyon an Comelec manungod sa pagpanao nin mga “of small value” na kasangkapan obligado an mga kandidato na magsumetir kan mga nasambit na rekisitos.

Matatandaan na pigpangalad kan Comelec an pagpanao nin kun anuman na bagay na may kantidad sa mga botante alagad itutugot na man nasambit na komisyon an mga panao kan kandidato.