Mga Gurang Sa Radyo

Ang huna ko pirme sana akong joven sa linya nin radyo, sagkod na sabihon kan emcee sa sarong masaganang Christmas Party kan fecha 12 kan Deciembre sa Taste and Spice Bar sa kanto kan Mayon Avenue asin Panganiban na an saiyang nabunot na maresibe kan first prize sarong gurangan na announcer na saiya daang pig dadangog kan siya aki pa. Sa pag olay olay mi ni Alex Bolante Parfan, an mga beterano sa broadcast na yaon kan banguing idto iyo si Alex Parfan, Bert de los Martirez, Danny Cuerdo, asin Elmer Abad. Duman nagpoon na magkumustahan kami ni Alex ta samuyang pinag giromdom an mga sinaunang kagamitan asin sisema sa radyo arog kan pag usar nin turn table asin plaka, an pag gamit nin telepono ta mayo pa nin cellphone asin an programa nin mga request and dedication na tunay na maogma sa pagmati nin sarong announcer. Kan samuyang pig sasaro-saro an istorya kan samuyang buhay kan kami mga bago pa sanang entra sa radyo, tunay na makahibe ta dai na nanggad maibabalik an dating maogmahon na buhay nin mga radio announcer na huna mo artista kung trataron kan mga tagahanga lalo na idtong yaon sa harayong lugar , sa mga kostal asin kabukiran. Sa pagsaysay ni Alex kan saiyang agi agi sa estasyon DWNW Budyong dai niya mapugol an sadiri kaya pirme niyang kapot an mahamoton na napkin ta iyo an pang pahid sa mga luha sa saiyang mga mata. Dai niya malingawan an saiyang StatIon Manager na si Mar Crisostomo aka Kuraw Kuraw. Mantang sa sakuyang lado, an inot kong radyo iyo an DZHN sa 3rd floor kan Supermarket kan Bulan nin Junio taon 1981. An mga naging SM ko sa DZHN iyo sinda Martin Pamulo na sarong ilokano asin si Efren Cantor na nag iirok ngonian sa sarong subdivision sa Baras Canaman alagad propiong taga Bolaobalite Tinambac, sagkod na naging manager ko si Celaso Baguio na nagretirong Judge duman sa Pampanga. Sa pag olay olay mi ni Alex Parfan, samuyang nagiromdoman an mga aktibo pa sa radyo na an iba matua pa samuya arog ni Elmer Abad na nadadangog pa sa DWNX, special mention man ki Wennie Ceas Ventura, Joe Grageda, Remy Manchos, Larry Javier, asin si Danny Cuerdo na haloy kaming nag iribahan sa DWRN. Durante kan Christmas Party kan fecha 12, nasambitan man an bantog na Mr Peso Man sa persona ni Edwin Lara alagad an orihinal na Mr. Peso Man iyo si Ben Turbo Reantazo. Kaya igua kaming pangapodan ko Cong. Sal Fortuno na sana mapaogma man niya ngonian na pasko an mga nagretiro na alaga buhay pang mga taga radyo kan mga dekada 70 asin 80 arog ni Atty. Henry Briguera. Pig tawan doon ni Alex na an mga announcer kaidtong samuyang kapanahunan iyo na malikay na marhay magtaram sa mikropono na minsan sa tataramon pang English asin Tagalog, asin deficil an maglaog sa radyo dahil sa istriktong audition. Pero an pinaka importante kan panahon iyo an pagkamoot sa mga taga radyo kan mga paradangog na yaon sa mga kostal asin mga kabukiran. An mga tagahanga na yaon sa harayong lugar grabe an kaogmahan kun nakakaresibe sinda nin retrato hale samuya ta mayo pa kaidto nin facebook asin internet, kun kaya boses sana an saindang naaraman kaya gustong mahiling an samuyang lalawgon. Naoogma kami sainda ta dai nanggad nakakalingaw magdara nin manok asin pulutan na bagas tuyong mina bisista sa Radio Station.