MNSC magiging pribado na, LGU libreng maggamit

Magiging pribado na an pagpadalagan kan 27 anyos nang Metro Naga Sports Complex (MNSC) na may hiwas nin diez hektarya sa Barangay Pacol, Ciudad nin Naga na papaarkilahan sa sarong pribadong kolehiyo alagad an City Hall libreng maggamit para sa actividades lokal asin mga palaro.

Kinumfirmar sa Bicol Mail ni City Administrator Elmer Baldemoro na an Naga College Foundation (NCF) iyo an solong nagsubasta alagad an Bids and Award Committee sa pamamayo ni Budget Officer Frank Mendoza padagos pa an ginigibong ‘'evaluation’’ antes e-award sa solong postador.

Dai paman sinabi kun pera an pig-opresir na arkila kan NCF mantang pighahalat an magiging desisyon kan BAC.

An pagpaarkila kan MNSC base sa ordinansa numerado 2023-096 na padreno si Consejal Salvador Del Castillo asin suportado kan mga miembros kan Sangguniang Panlungsod.

Sa seccion 4. An bulanan na arkila cantidad P100,000 asin dapat advance nin sarong bulan sa cada ika-limang aldaw kan bulan mantang sa ‘'Duration Lease’’ abot sa 15 taon, renewable sa maximum sa kaparejong peryodo o 15 taon, asin sa cada ika-limang taon magkakaigua nin liwat na pag-aadal sa kontrata.

Sa ordinansa an LGU dapat segurohon kan ‘’lessee’’ na pagamiton nin libre an City Hall para sa saindang actividades siring kan Palarong Bicol, Palarong Pambansa asin Palarong Panlungsod, Miss Bicolandia, mga actividades na may relasyon sa Peñafrancia Fiesta asin iba pa.

An mga lugar kan MNSC na kabale sa arkilado iyo an Grandstand, Dormitories, offices, comfort room, dressing room, football field, track oval, tennis courts and gallery, swimming pool and gallery and kiosks, baseball/football field, parking area alagad afuera kan atubangan na porsyon kan MNSC hale sa gate asin atubangan na kudal pasiring sa grandstand asin Naga City Children’s Home.

Katuyohan sa pagpa-arkila kan City Hall nganing mamantenir an mga facilidades asin kalinigan.

Nakumpleto an Sports Complex kan 1997 sa administrasyon ni dipunto asin dating DILG Secretary Jesse M. Robredo.

Grandstand kan Metro Naga Sports Complex na enot ginibo digdi an Palarong Pambansa 1997 sa panahon ni dipuntong Alcalde Jesse M. Robredo asin nagsunod na mga Palarong Pambansa kan taon 2004 asin 2007. (DPA)