NAGPOON SA P300: P10K supply allowance kan mga paratukdo, ‘good news’

Hale sa dating P300 duwang decada nang nakakaagi sagcod nagsakat sa P5,000 alagad ginibo nang P10,000 an marerecibing supply allowance kan mga paratukdo sa escuelas publica na epektibo sa 2025-26 school year kasunod kan pagkaka-aprubar kan ‘'Kabalikat sa Pagtuturo Act’’ (Acta Republica 11997).

‘'Good news ini sa mga teachers’’, segun sa reaksyon ni Sulficio Alferez III, principal kan Camarines Sur National High School sa Ciudad nin Naga na iguang labing onse mil na populasyon nin estudiantes.

An RA 11997 pinirmahan ni Presidente Ferdinand R. Marcos Jr. kan Hunyo 3, 2024 sa presencia ninda Senate President Francis ‘'Chiz’’ Escudero, House Speaker Martin Romualdez mantang kabale sa imbitado kan Presidential Legislative Liaison Office kan Malacañang an co-author kan House version kan ley, Camarines Sur 3rd district Congressman Gabriel H. Bordado Jr. asin kairiba an ibang mga lideres nin paratukdo.

Presente pa sa okasyon iyo an ibang mga congresista, senador maging opisyales kan Department of Education.

Piglalaoman na sa propuestong 2025 national budget na nakatalaan isumiter sa laog nin 30 diyas pakatapos magpoon an third regular session kan Congreso sa Hulyo 22, 2024 dapat kabale na an teaching allowance increase na mandato na kan ley matapos pirmahan ni Marcos kan Hunyo 3, 2024.

Igua pang bastanteng oras an Department of Budget and Management nganing makaayon na an dugang na allowance.