Nata Ta Siring?
![](https://static.wixstatic.com/media/93486f_029019c2343b43598340114040cd0ed8~mv2.jpg/v1/fill/w_980,h_419,al_c,q_85,usm_0.66_1.00_0.01,enc_auto/93486f_029019c2343b43598340114040cd0ed8~mv2.jpg)
An buhay sa panahon na ini digdi sa Pilipinas na inarogan man lang sa ibang nasyon partikularmente sa America, Europa asin Hapon sa biglang tingin feeling rich an mga mayayaman asin ire-igwahon, feeling poor an mga tios asin mayong-mayo pero sa totoo lang masalimoot an buhay sa Pinas.
Sa transportasyon na sana modern na daa, tambak na an awto sa kalye—mga magagarang kotse, mga mamahalon na motorsiklo, mga darakulang truck na pano nin produkto pati mga e-trike na dae nagbubuga nin maating aire.
Pero kwedaw ka kan problema kan may mga saderi iyo an palpak na tinampo, mayo nin garahe, mahal an krudo, gasolina asin asayte pero pag nasa laog ka kan kotse na kaskas an dalagan feeling rich ka na lingaw na may problema an gobyerno asin an nasyon.
Magagayon an mga harong, may mga codominium units, may mga mansion asin kadakul na pating mga hotel na madadagusan kun ika sarong biyahero o turista.
Alagad may nakapag-hinghing sako na kun an may sadering awto problemado kan presyo kan krudo, nakakaseguro daw kita na may tultol na panira sa laog kan magagayon na harong?
Mayo daw problema an pamilya?
Lakop na talaga an magagayon na estada asin lunadan sa satuyang nasyon.
Pati an mga tinampo asin highway abang hihiwas abang lalaba asin abang gagayon.
Pero kun updated ka ta sige an dangog mo nin bareta asin komentaryo mahapot ka man guiraray nata ta pirmi sanang sapa kan mga taga-media asin social media an pagtios kan mga tao, an halangkaw na presyo kan mga barakalon, mayo nin bagas asin sige an iriwal kan mga politiko lalo na an mga congresistas asin senadores.
Tama daw an padalagan kan gobyerno sa kamot kan aki ni Ferdinand Romualdez Marcos Jr?
Imbes na magkasararo asin maguin trangkelo an buhay bako lang sa mga cuidades asin darakulang banwaan kundi pati sa hararayong barangay, ano daw kun magpahingalo kita sa politika habang harayo pa an pirilian?
Nata ta an mga elitista asin mga milyonaro y bilyonaryong negosyante sige an urutang sa darakulang banko kan gobyerno pero an delhensya hali sa saindang transaksyon idinideposito sa mga banko sa abroad arog sa Switzerland?
Tano ta an America, an pulis kan kinaban saka an satuyang among tunay nagpaparayaman alagad kitang nasasakupan nag-titirios?
Ano daw an Pilipinas Independienteng nasyon o bako?
Ano daw an Independiencia kan Pilipinas kan Hunyo 12, 1898 o Hunyo 4, 1946?
Aber daw ano an masasabi nindo kaiyan?
Comentários