NEA, NGCP preparado nasa pirilian nasyonal, lokal

An mga cooperativa nin electricidad asin National Grid Corporation of the Philippines (NGCP) naka-alerto sa nagdadangadang na eleksyon nasyonal asin lokal nganing maseguro na 24/7 an suplay kan kuryente antes asin sa aldaw kan pirilian sa Mayo 9, 2022.

An National Electrification Administration (NEA) nagpaluwas nin directiva sa mga cooperative nin electricidad na magbilog nin Bantay-Kuryente Election 2022, sarong task force na dapat alertado an saindang personajes sa laog nin 24 oras nganing makaresponde tolos kun igwang problema sa mga linya encaso biglang magbagsak an suplay kan kuryente.

Si Rinner Bucay, parataram kan Camarines sur II Electric Cooperative (Casureco II) nagsabi liwat magkakaigwa pa sinda nin clearing operations sa mga banwaan na yaon sa laog kan saindang coverage area.

An onseng mga cooperativa nin electricidad sa rehiyon cinco anas nag-aandam kabale na an pagpadagos kan mga clearing operations.

Dakulang bagay na nakaalerto an NGCP mantang kun igwa sindang problema sa suplay kan kuryente mayo na sa kontrol kan cooperativa asin an saindang mga lineman preparado sa ano man na pagresponde kun kinakaipuhan, sabi pa kan Casureco II.

Overall Command Center kan NGCP 24/7 an operasyon poon sa Mayo 8, 2022 nganing mamonitor an suplay kan kuryente sa panahon kan eleksyon. (NGCP)

Sa NGCP sa pinaluwas na press release kan saindang opisina hale sa barangay Del Rosario, Ciudad nin Naga pigpahayag na alertado an saindang personajes sa 24/7 operations kan saindang Overall Command Center puon sa Mayo 8-10 bilang parte kan saindang pag-andam na maseguro an power transmission operations kan facilidades sa panahon kan eleksyon nasyonal asin lokal.

Bulan pa nin Febrero ngunian na taon an NGCP’s Power Task Force, sarong special team na pigbilog nganing nakaandam man sinda sa seguridad asin maseguro na areglado an transmission network sa nasyon sa panahon kan eleksyon.

Igwa na sindang ginibong koordinasyon sa Commission on Elections asin iba pang ahencias de gobierno sa ano man na bagong directiva ano man na oras na maging sa paghaman kan saindang contingency plans.

Kabale sa saindang nakaplano iyo an pag-monitor ano man na insidente na makaresponde an saindang ahencia sa tabang kan Comelec sa koordinasyon sa AFP asin PNP.

Sa ngunian an ginigibo kan NGCP iyo an padagos na pagkunducir nin clearing operations sa arin man na posibleng maging kritical an linya kabale na an mapadapit sa seguridad.

Igwa sindang gigibohon na advisories sa situasyon kan suplay kan kuryente cada apat na oras. Dawa aldaw nin special non-working day an Mayo 9 alagad matrabajo an saindang gabos na staff kabale an operational, line crews, engineers, pilots mientras nakapuesto an saindang technical personnel sa mga estratihicong lugar kan substation nganing pacil na an pagresponde. (DPAureus)