Nene, Bayani kan WW1

Maogma pagmati-mation an magagayon na istorya nin buhay na satuyang nadadangog o nadadalan, maski sain asin kasuarin pa ini nangyari. Minsan sa pag abre ko kan sakuyang FB, naagihan ko an sarong istorya na pig post nin sarong Sophie Carter na nagtatao nin kredito sa orihinal na pinag halean kan istorya na iyo si Evaline Brueton, Consulting Historian – Disability Pride Month Series, sarong publikasyon hale duman sa Britanya. Si Ruby Crane, 3 anyos, nag istar sa St. Dunstan’s Rehabilitation Center duman sa Brighton Sussex, sarong magayon na lugar sa Sur na parte kan England. Nabisto sa interong England an ginibo ni Ruby ta saiyang pig tatabangan an mga soldados na nagka buruta durante kan WW1. Si Ruby , iyo an aki kan hardener sa St. Dunstan’s asin sa saiyang pagkakawat sa palibot kan Dunstan, naging ugali niya an sungkoon an mga butang soldados na malakaw pasiring sa saindang Workshop. Naintindihan kan joven pang si Ruby na an mga soldados dai nakakahiling kaya dapat kabiton sa paglakaw para ihatod pasiring sa mga papadumanan na Workshop. Maogmahon sa pagmati kan mga butang soldados na may sadit asin malomhok na kamot an saindang nakakapotan para sinda tabangan sa paglakaw. An karahayan nin boot ni Ruby nagtaong kaogmahan sa komunidad kaya an mga tawo, nagduhol saiya nin mga regalo arog kan monyika, mga kawatan asin iba pa. Mala ta an saiyang retrato pinag ladawan sa front page kan St. Dunstan’s First Annual Report kan taon 1915-1916, asin nag agi an mga panahon an mga banderitas kan Dunstan’s parati nang ikinakaag an retrato ni Ruby, bilang pag tao nin onra sa saiyang naginibohan. Kan gurang na si Ruby Crane, saiyang sinabi sa sarong Press Statement na saiyang naiimahenar an sadit niyang kamot na kapot an darakulang kamot kan mga soldados, asin sinabi niya sa joven niyang edad na tolong taon, aram niya na an mga soldados buta asin kaipuhan tabangan sa paglakaw. Si Ruby pinag biyayaan nin halawig asin maogmang buhay, nagadan siya kan 2011 sa edad na haros 100 na taon. An saiyang legasiya padagos na nabubuhay mala ta pinag feature siya sa sarong babasahon sa England na may titulong Disability Pride Month Series. Garong gayong magayon man nanggad na nakakabasa kita nin istorya nakaka inspirer sa buhay keysa pag para atenderan ta an mga istorya tungkol sa dorolak sa pulitika.