NFA palay buying price sa CSur/CNorte binaba sa P24

Nagbaba an National Food Authority (NFA) buying price sa alang na paroy nin paraoma sa P24.00 cada kilo hale sa dating P30.00 alagad an dahilan nagsasabay an ahencia sa paghuros sa presyo kan bagas sa mercado asin sa mga kumprada.

Sa ngunian nagbaba nin tres hasta siete pesos an cada kilo kan bagas sa mga mercado huli kaini, naghuros man an NFA buying price nganing makatabang sa consumedores an pagbaba sa presyo nin bagas.

Si NFA Assistant Provincial Manager Jonathan Cabrillas kan Camarines Sur/Camarines Norte Branch kan ahencia nagpahayag sa entrevista kan Bicol Mail ini kasunod kan dating paglangkaw kan NFA buying price kan Abril 2024 base sa enot na desisyon kan NFA Council.

Katuyohan kan sinambit na desisyon kan NFA Council nganing matabangan an sektor nin paraoma mantang naglalangkaw kan mga nakaaging bulan an presyo kan bagas.

An dating presyo kan tungod nin paroy kan NFA nag-aabot sa P19.00 hasta P23.00 alagad ginibo kaidto nin P30.00. Nagduwang semana sana si paglangkaw kan presyo nin paroy asin sa ngunian reclamo na kan paraoma mantang sa pribadong kumprada nagcacantidad na sanang P21.00.

Dawa naghuros si saindang tungod sa paroy kan mga paraoma alagad nag-abot nin labi sa 100 por ciento sa saindang target an palay procurement, sabi pa kan assistant provincial manager.

Sa inbentaryo sa bodega igua nang 200 mil na sakong paroy alagad kun momolinohon magiging 126 mil na sakong bagas asin igua pang stock na tres mil na sakong bagas.

An Camarines Sur/Camarines Norte pigsaro na sanang sanga kan NFA huli sa epekto kan Rice Tariffication Law sa panahon ni dating Presidente Rodrigo Duterte.

An LGU sa provincia nin Camarines Norte nagtaong P5.00 na insentibo sa cada kilo kan paroy nin paraoma na babakalon kan NFA. An insentibo iyo an inaapod na Palay Marketing Assistance Program for Legislators and Local Government Units. Laen kan LGU CamNorte an iba pang provincia na iguang kaparejong programa iyo an Albay asin Sorsogon.

Presyo kan bagas sa Naga City People’s Mall nagbaba alagad dai nangyari si pangako ni PBBM na P20.00 cada kilo. (Bicol Mail)