Ninang Ninong

Kan Sabadong naka agi kinaulay ako kan si amigo ko:

“Manny, muya kan aki ko na ika an mag tubong sa bunyag kan su ika tolo nindang aki. Kaurunon ko daa ika.” An sabi sakuya kan amigo ko na si Sixto.

“Sige, sabihon mo na maghirilingan kita saaga paka simba nindo asin pagurulayan ta.” An simbag ko saiya.

Sa madiling istorya nag iyo ako sa pag tubong kan makuapo ni Sixto. Gigibohon ini sa primerong semana kan maabot na Septiembre sa sarong simbahan sa New Jersey. Duwa daa kaming ninong saka duwang ninang.

Kasubagong aga mientras nag la lakaw-lakaw ako, nag laog sa isip ko na bakong basta-basta an pag tubong sa bunyag kan sarong aki. An aram ko nag surat na ako kaidto manungod sa pagigin ninong. Ngunian naiisip ko na naman si mga pag tubod ko na dakulang responsibilidad an pag tubong o pag sponsor sa sarong aki.

Kustumbre ta na an pag tao nin mga regalo sa pag abot kan Krismas asin kaaldawan kan tinubong ta. Pero natubod ako na an pinaka importante sa parte kan ninong iyo an pag tukdo asin pag giya sa satuyang tinubong na magka igwang marhay na buhay kristiyano.

May mga tinubong ako kaidto na dae ko na aram kun yarain na sinda ngunian. Minsan hinahapot ko an sadiri ko kun ano na daw an mga estado ninda sa buhay.

Giromdom ko man na kan mga aki pa kami, si ninang ko pirmi ako nalilingawan ta naka istar siya sa Manila. An nagiromduman ko pa, pirming nasusupog na maray si saro kong tugang kun pinapaduman siya ni Mama sa ninang niya pag Krismas. Kaya lang, mayo daa pirmi si ninang niya pag na duman siya.

Sa experiensa ko, mayo man sa mga naka agi kong mga ninang saka ninong an nag tao sakuya nin giya sa pag buhay kristiano.

Pero tano ta tinatawan ko ini nin dakulang importansia?

An bunyag kaya iyo an primero asin pinaka importante sa satuyang mga sacramento. Kun mayo ini, dae ta ma reresibe an ibang sacramento.

Sa mga katoliko asin ibang relihion kristiano, an sponsor o ninang saka ninong iyo an nag nagtataram para sa aki. Sinda an nagsisimbag sa pag aku kan promesa na maging marhay na kristiano an tinutubong ninda, mientras dae pa nakakataram an aki.

Tano ta sinasabi ko ining mga bagay na ini?

An bunyag sarong bagong kamundagan asin an ninong o ninang an nagigin spiritual na magurang kan aki. Iyan an nagigin relasyon ninda.

Garo man lang iyan nag “proxy” ka para sa mga magurang kun dae ninda matawan nin marhay na buhay kristiyano an aki. Nagigin obligasyon ini kan mga nag tubong.

An mga responsibilidad asin obligasiones kan mga ninong asin ninang dae natatapos pero na poon pagka tapos kan seremonyas.

Kun arog lang kaini an pag hiling tang mga ninong asin ninang, magigin mga representante kita kan satuyang pagtubod. Magigin sarong honor satuya na ipamidbid an satuyang tinubong na aki sa satuyang mga kristianong kairiba.

Garo harani na naman an kamundagan kan satuyang Kagurangnan. Dae ta po malingawan na kulibaton si satuyang mga tinubong asin si mga nag tubong satuya. Kairiba na digdi si mga sa kumpirma asin sa kasal.

Mano po Ninong! Mano po Ninang!