NPA (Nilo Portes Aureus)

Kan naka-aguing dekada surunudan kaming naguing biyudo.

Enot si Ompong Baldemor aka Rudy kan magtalikod an saiyang agom. Masunod si Nilo kan biglang nagadan an saiyang esposa. Ika-tolo ako kan magadan sa pagkakaturog an sakuyang misis. Huli ta kaming tolo pirming nag-kakarape-kape sa SM, pig-arapod kami kan Kantong Putikon members asin social media netizens na “Tres Balos”.

Dae naghaloy ta an saro samuya si Nilo aka NPA nakakua nin magayon asin maboot na partner na maataman asin maaling saiya mantang kami ni Ompong siribot sa samong kanya-kanyang raket. Si Ompong sa Naga College Foundation asin ako bilang columnist kan Bicol Mail.

Tig-limang taon an distansya kan edad mi, si Ompong 80, ako 75, si Nilo 70 na nag-birthday pa lang kan nagtalikod na semana.

Si Ompong nagka-igwa nin aneurysm alagad nabulong, nagastos nin labing 1 milyon pesos sa sarong ospital sa Metro Manila. Si Ompong na editorial writer kan diaryo iyo an saro kan mga directors sa NCF asin pamayo nin manlaen-laen na proyekto kaya ngonyan an Naga College an may pinaka-dakulang enrollment sa Camarines Sur.

Si Nilo balik-balik sa Manila ta nagpapabulong kan saiya man na kamatian na an sabi niya lung cancer. Pero igwa pa daang ibang helang arog kan kumplikasyon sa puso.

Si Ompong na dae na nakaka-drive kun bangui mabagsik naman ta mala aga-aga nag-brisk walking sa palibot kan Robinsons Place. Nakakatrabaho pa bilang executive, nakaksurat pang editorial sa Bicol Mail, nakaka-biyahe pa sa abroad asin sa Mindanao asin nakaka-aling pa sa saiyang makuapo na si Jaira.

Ako ta retirado na sa politika, broadcast, TV asin radyo, sa Bicol Mail nawalat dahil sa lealtad ki Nilo P. Aureus na nag-imbitar sako na organisaron an Bicol Mail 22 anyos na an naka-agui, magsurat nin librong “Ini an Totoo” na ipupublikar kan Bicol Mail asin maguin aro-alalay kan semanal na pag-guibo kan diaryo.

Padagos si Nilo sa paguiguin publisher kan Bicol Mail poon kan Hunyo 18, 2002 asin iyo an primerong publisher nin diaryo na nakapatugdok nin sadering edeficio asin imprenta, an Goldprint Publishing House.

Saludo an gabos na taga-media ki Nilo bako lang mga peryodista, radyo asin TV pati social media. Pig-probaran niyang ontokon an Bicol Mail kan Septembre 2022 mala ta sarong bulan dae nagluwas an diaryo pero nagbago si isip niya mala ta pig-buelta si publikasyon pakalihis nin sarong bulan ta naguiromduman niya an saiyang pangako ki Inang Nuestra Seήora de Peήafrancia na dae niya pupundohon an Bicol Mail.

Nabisto ko si Nilo kan siya manager pa kan AMS Press, bako pa siyang mayaman. Naguiguiromduman ko napilayan siya sa pakikipagkawat sa mga kapwa empleyados kan AMS.

Kan 2002 ta bako na akong bokal ta bawal mag-re-election pakalihis nin siyam na taon na dire-diretsong pagserbe sa Sangguaniang Panlalawigan, dae man ako maka-kandidatong mayor sa Naga na iyo an sugo ni Gov LRV ta pagtubod ko dae man ako magana kontra sa saiyang paboritong sobreno na si JMR. Taga-Milaor pati ako saka ako an nagkasal sainda ni Leni kan ako mayor duman.

Kan ulayan ako ni Nilo na tabangan ko siyang magbukas nin diaryo bilang flagship kan Goldprint tinakma ko tulos.

Nag-aarkila pa siya kadto sa sarong dakulang edeficio na saderi nin sarong Intsik sa Concepcion. Bako ngunang Bicol Mail an pangaran. Alagad kan maka-ulay mi si Atty. Stephen F. Sergio, dating BM editor-in-chief, sinabi niya na pwede nang gamiton an pangaran kan diaryo ta an mga miyembros kan pamilya kadtong Leon Sa. Aureus Sr, primerong mayor kan Naga asin orihinal na BM publisher asin tugang kan saiyang ama gabos na Americans citizines, garadan na an iba kaya pwede nang usaron an ngaran na Bicol Mail basta an retrato ni Mayor Aureus nasa laog kan editorial box.

Si Nilo Aureus sobreno ni Leon Aureus ta an ama ni Nilo tugang na nguhod ni Leon na sarong lider kan mga guirelya asin heroe kan World War 2.

Antes kan publikasyon nagrilibot nguna kami ni Nilo poon Legazpi, Iriga asin Daet asin gabos na diaryo lokal sa Naga tanganing magkonsulta asin magpaaram na mabalik guiraray an diaryong Bicol Mail.

Labing 20 anyos na pighangaan an diaryo, pigbasa nin kadakul bako lang nin mga Bikolano kundi pati dayuhan sa tataramon na English asin Bikol, naka-producir nin konsehal sa Naga, naka-publikar nin diaryong Bikolnon asin may bendisyon hali sa Simbahan/Archdiocese of Caceres asin mismo kan Ina kan Kabikolan na si Seήora de Peήafrancia.

An enot na isyu kan Bicol Mail (Part 2) sa lindong kan liderato ni NPA kan Hunyo 18, 2002 sa enot na pagcelebrar kan tamang petsa kan anibersaryo kan Naga City Charter.

Si Dr Danny Gerona an primerong editor, nagsunod si Levi Aureus na sinundan ni Joe Perez na City Councilor na ngonyan asin an presenteng nakatukaw na si Jayson Neola bilang editor.

Si Danny Aureus na tugang na nguhod ni Nilo iyo an permanenteng editor kan Bicol section (back page) poon kadto sagkod ngonyan.

Si Atty Henry V. Briguera an legal officer asin si Pete Servano an marketing manager-circulation manager na pareho nasa laog kan editorial box pagpuroon.

Kun ako hahapoton mayo pang makakaribay sa naguinibuhan ni NPA sa Bicol journalism huli sa saiyang pagpugol kan liderato kan Bicol Mail/Goldprint asin kan print media bako lang sa Naga kundi sa bilog na Kabikolan.

Sa ultimo ming urolay saka ni Ompong kan Disyembre segun saiya mismo andam na an saiyang duwang aki na pugolan an saiyang negosyo asin padalaganon an Bicol Mail.