Ordinansa sa epektibong pagcolecta nin basura ipapasunod sa 27 brgy

An Sangguniang Panlungsod kan Ciudad nin Naga nagpanday na nin sarong ordinansa nganing magin epektibo an pagcolecta nin basura, masunod an pagtipon kan nalalapa asin dai nalalapa, asin para sa kalinigan sa 27 barangay kan ciudad.

Sinda Consejal Ghiel Rosales, pamayo kan Committee on Environment asin saiyang pag-iriba sa komite na sinda Consejales Vidal Castillo, asin Corazon Peñaflor mga padreno kan ordinance No. 2025-002 na pinaboran kan gabos na miembros kan SP.

Sa entrevista ki Consejal Castillo kan Bicol Mail, sinabi kaini na saro sa mayor na katuyohan nganing estrictong ma-implementar sa mga barangay an pagsuway kan nalalapa asin dai nalalapang basura.

Sinabi pa ini iyo ‘‘An ordinance Instituting an engagement with the 27 barangays of Naga in the management, collection, and disposal of solid wastes; appropriating funds therefor’’, inaprubaran kan SP kan Febrero 4, 2024 asin pirmado na kan jefe ejecutivo alagad an fondo sa implementasyon kan ordinansa tatagamahan sa 2026 annual budget.

An ordinansang ini aapodon na ‘‘Barangay Solid Waste Management Volunteers Ordinance of Naga City.''

An mga volunteer workers magkakaigua nin honoraria sa cantidad na tres mil (3,000.00) pesos cada bulan. Laen pa kaini an SWMO matao nin ondra asin insintibo taon-taon sa mapililing estrictong nakaka-implementar sa kalinigan asin malinig na comunidad.

Oras na magsikad na sa mga barangay an implementasyon sa ordinansa dakulang tabang sa Solid Waste Management Office (SWMO) para makaskas an pagcolecta kan mga barangay sundo sa paghakot pasiring aponan basura sa Barangay San Isidro.

Kan panahon na si Castillo iyo pa an Barangay Captain sa Barangay Calauag, nagkaigua nin dakulang ondra an saiyang barangay matapos makarecibe nin ‘‘Regional Award for Eco Waste Tilt’’ huli sa pulidong pag-implementar kan pagtipon sa mga nalalapa asin dai nalalapang basura sa saindang barangay. An sinambit na award pigtao ni dating Presidente Gloria Macapagal Arroyo na ginibo sa Malacañang kan Agosto 5, 2004. Nakabale pa siya sa nagrecibe nin ondra bilang kabale sa ‘‘national finalist’’ na ginibo an kaparejong programa sa Malacañang kan 2004.

Dinagdag pa kan consejal an SWMO iyo an natukahan na mag-monitor kun epektibong napapasunod an mga probisyones kan ordinansa mantang dapat mag-sumiter nin annual report sa opisina kan jefe ejecutivo asin SP.