Paratukdo na iguang pinsan nin candidato bawal magserbe sa pirilian

Dai tutugotan kan Department of Education (DepEd) sa Camarines Sur an mga paratukdo na pinsan o sadiring tawo nin candidato na maserbe sa mga voting precinct sa maabot na eleksyon lokal asin nasyonal sa Mayo 12, 2025.

Ini nganing maibitaran an ano man na mga pagduda sa eleksyon asin dapat seguradohon na mayong ‘‘political interest’’, sabi kan opisyal na spokesperson kan DepEd CamSur sa paagi ni Abogado Salvador Pelingon.

An saindang paratukdo maagi ngona sa training sa paggamit nin Automated Counting Machine kan Commission on Election (Comelec) na gagamiton sa midterm elections.

Hinagad kan DepEd nganing mayong problema si paratukdo na iguang pinsan nin candidato dai na magpalista sa Comelec.

An mga Election Officers sa cada banwaan naghahagad nin listahan kan paratukdo na maserbe sa maabot na pirilian nganing maging katuwang sa matuninong asin malinig na midterm elections.

An Comelec enot nang naglibot sa mga barangay nganing idemonstrar an gagamiton na ACM machine asin sa masunod na bulan sa grupo na nin mga paratukdo hale sa DepEd.

Cada eleksyon an mga paratukdo kan DepEd iyo an tinitiwalaan kan Comelec asin kan publico.